O‘zbekistonda kuzatilayotgan ekstremal issiq tufayli Ekologiya qo‘mitasi daraxt va o‘simliklarni soat 10:00 dan 17:00 gacha sug‘ormaslikni hamda bu jarayonni tungi vaqtga ko‘chirishni so‘radi.
O‘zbekistonda kuzatilayotgan ekstremal issiq ob-havo munosabati bilan Ekologiya qo‘mitasi fuqarolarni soat 10:00 dan 17:00 gacha bo‘lgan vaqt oralig‘ida daraxt va o‘simliklarni sug‘ormaslikka chaqirdi. Ushbu vaqtda sug‘orish ularga faqat zarar yetkazadi.
Ekologlarning ma’lumotlariga ko‘ra, kunning ayni qizigan vaqtida sug‘orish hech qanday foyda keltirmaydi va o‘simliklarga salbiy ta’sir ko‘rsatadi. To‘g‘ridan-to‘g‘ri quyosh nurlari ostida barglar va poyalarga tushgan suv tomchilari linza vazifasini bajarib, o‘simlikda jiddiy kuyishlarni keltirib chiqaradi.
Quyoshdan qizigan tuproqdagi namlik tezda bug‘lanib, ildiz tizimini tom ma’noda «pishirib» (dimlab) yuboradi va bu yashil maydonlarning nobud bo‘lishiga olib kelishi mumkin. Kuchli jazirama vaqtida daraxtlar va boshqa o‘simliklarni qat’iy ravishda kechki, tungi yoki ertalabki vaqtlarda — soat 20:00 dan 05:00 gacha sug‘orish zarur. Aynan shu vaqt oralig‘ida tuproq va havo harorati pasayadi, natijada namlik ildizlar tomonidan samarali so‘riladi va o‘simliklarga kunduzgi stressni yengib o‘tishga yordam beradi.
Anomal issiq sababli joriy etilgan boshqa cheklovlar
Avvalroq O‘zbekistonda ekstremal issiq ob-havo sharoiti tufayli bir qator muhim cheklovlar va choralar belgilangan edi:
-
Ishchilarni himoya qilish: Davlat mehnat inspeksiyasi ish beruvchilarga anomal ob-havo tufayli xodimlarning ochiq havoda ishlashini kunning eng issiq vaqtida — soat 11:00 dan 16:00 gacha cheklash yoki to‘xtatishni tavsiya qilgan edi.
-
Bog‘chalar faoliyati: Jazirama harorat sababli mamlakatda bolalar bog‘chalari faoliyati vaqtincha to‘xtatilgan edi.
-
Yashil hududlarni asrash: O‘zbekiston Ekologiya qo‘mitasi aholi va mas’ul xizmatlarni anomal issiq davrida daraxtlar hamda yashil maydonlarni himoya qilish uchun qo‘shimcha choralar ko‘rishga chaqirgan edi.
Izohlar
Hozircha izohlar yo‘q