Isroil Bosh vaziri Binyamin Netanyaxuning idorasi Vashingtonga G‘azo bo‘yicha taklif etilgan reja yuzasidan e’tiroz va xavotirlarini yetkazdi. Tel-Aviv HAMASning to‘liq qurolsizlanishini talab qilmoqda.
Isroil Bosh vaziri Binyamin Netanyaxuning idorasi AQSh tomonidan ilgari surilgan G‘azo sektoridagi vaziyatni tartibga solish rejasiga rasman e’tiroz bildirdi va o‘z xavotirlarini Vashingtonga yetkazdi. Bu haqda Al Arabiya va AFP agentliklari xabar berdi.
Isroil Bosh vaziri idorasi matbuot kotibi Doron Spilman jamoatchilikka e’lon qilingan reja varianti Isroilning rasmiy pozitsiyasini aks ettirmasligini ta’kidladi. AQSh prezidenti Donald Tramp HAMAS qurolsizlanishga va qurollarni yangi tuzilayotgan Falastin boshqaruv qo‘mitasiga topshirishga rozi bo‘lganini olqishlab, Isroil bu o‘zgarishlardan mamnun ekanini bildirgan edi. Biroq Tel-Aviv bu bayonotlarni rad etmoqda.
Isroil razvedkasi ma’lumotlariga ko‘ra, HAMAS 2025-yil oktyabrida erishilgan otashkesim rejimiga qaramay, harbiylashtirilgan guruhlarni qayta qurollantirish va kuch to‘plashda davom etmoqda. Netanyaxu vakilining so‘zlariga ko‘ra, HAMASning amaldagi harakatlari yangi hujumlarga tayyorgarlik ko‘rilayotganidan dalolat beradi.
Isroil tomoni har qanday uzoq muddatli kelishuvning asosiy shart sifatida HAMASning haqiqiy va ortga qaytmaydigan tarzda to‘liq qurolsizlanishini ko‘rsatmoqda. Qurolsizlanish jarayoni Isroil tomonidan to‘liq tekshirilmaguncha, mamlakat qurolli kuchlari G‘azo sektoridan olib chiqib ketilmasligi va harbiy zarbalar davom ettirilishi ma’lum qilindi.
