Binyamin Netanyaxu AQSHning 3,8 mlrd dollarlik harbiy yordamidan voz kechmoqchi. Isroil kelgusi 10 yilda o‘z qurol-yarog‘ ishlab chiqarishiga 119 mlrd dollar sarflaydi.
Binyamin Netanyaxu kelgusi o‘n yil davomida AQSH tomonidan taqdim etiladigan harbiy moliyalashtirishni to‘xtatish niyati borligini e’lon qildi. Isroil bosh vazirining so‘zlariga ko‘ra, hozirda har yili olinayotgan 3,8 milliard dollarlik yordamni bosqichma-bosqich nolga tushirish vaqti kelgan. Ushbu jarayonni AQSHdagi siyosiy o‘zgarishlarni kutmasdan, hoziroq boshlash ko‘zda tutilgan.
Biroq, Netanyaxuning bayonotlari ba’zi tahliliy ma’lumotlarga zid kelmoqda. Xususan, noyabr oyida Isroil AQSH bilan har yili 4 milliard dollar ko‘mak olishni ko‘zda tutuvchi 20 yillik strategik shartnoma imzolashi haqida xabarlar tarqalgan edi. Ma’lumot uchun, so‘nggi ikki yil ichida Vashington Isroil mudofaasi uchun 21,7 milliard dollar sarflagan, bu esa ikki davlat o‘rtasidagi harbiy aloqalar hali ham o‘ta yuqori ekanligini ko‘rsatadi.
AQSHdan tashqari, Isroil Yevropa davlatlaridan ham qurol sotib olishni davom ettirmoqda. 2024-yilda Fransiya 424 million dollar bilan bu borada yetakchiga aylandi, Germaniya va Gretsiya ham asosiy yetkazib beruvchilar qatoridan joy oldi. Kelgusi 10 yil ichida Isroil o‘zining harbiy-sanoat majmuasini rivojlantirishga 119 milliard dollar yo‘naltirishni rejalashtirmoqda, bu esa mamlakatning qurol-yarog‘ masalasida to‘liq mustaqillikka intilayotganidan dalolat beradi.
