O‘zbekiston birinchi yarim yillikda 359,5 mln dollarga 72 ming tonna mol go‘shti import qildi. Hindistondan yetkazib berish hajmi deyarli barcha boshqa mamlakatlardan keltirilgan go‘sht hajmiga tenglashdi.
O‘zbekiston xorijdan mol go‘shti xarid qilish hajmini oshirdi. Milliy statistika qo‘mitasi ma’lumotlariga ko‘ra, 2026-yilning birinchi yarim yilligida respublikaga 359,5 million dollar qiymatidagi 72 ming tonna mol go‘shti import qilingan. O‘rtacha hisobda go‘shtning bir kilogrammi taxminan 60 ming so‘mdan to‘g‘ri kelgan. Ushbu ko‘rsatkich 2025-yilning mos davri bilan taqqoslaganda 9,1 foizga o‘sgan.
O‘zbekistonga go‘sht import qilishda Hindiston yetakchilik qilmoqda. Ushbu mamlakatdan yetkazib berilgan mol go‘shti hajmi deyarli barcha boshqa davlatlardan xarid qilingan umumiy hajmga tenglashib qoldi. Import statistikasi bo‘yicha mamlakatlar ulushi quyidagicha shakllangan: Hindiston — 33,9 ming tonna, Belarus — 19,6 ming tonna, Qozog‘iston — 10,6 ming tonna, Pokiston — 4 ming tonna hamda boshqa mamlakatlar — 4 ming tonna.
So‘nggi yillarda O‘zbekistonda go‘sht tanqisligi sezilmoqda, mol va qo‘y go‘shti narxining oshishi esa aholi uchun inflyatsiyaning asosiy ko‘rsatkichiga aylandi. Avvalroq prezident go‘sht, sut va tuxum narxlari barqarorligini nazorat qilish bo‘yicha topshiriq bergan hamda ushbu vazifani uddalay olmagan amaldorlarni ishdan bo‘shatish bilan ogohlantirgan edi.
Hukumat tomonidan go‘sht yetishtirish hajmini oshirish bo‘yicha bir qator qo‘llab-quvvatlovchi choralar belgilangan. Shuningdek, yuz minglab bosh yirik shoxli qoramol xarid qilish hamda O‘zbekiston bozori uchun go‘sht va sut mahsulotlari yetishtirish maqsadida Belarusda yer ijaraga olish bo‘yicha tajriba loyihasini amalga oshirish rejalashtirilmoqda. Bundan tashqari, Afg‘oniston Islom Emiratidan go‘sht xarid qilish va Toshkentni afg‘on oziq-ovqat mahsulotlari bilan ta’minlash kabi takliflar ham ilgari surilmoqda.
Izohlar
Hozircha izohlar yo‘q