Farg‘ona viloyati Uchko‘prik tumanida obodonlashtirish ishlariga jalb qilingan «Inson» markazining 34 yoshli xodimi o‘t o‘radigan moslama tig‘i sanchilishi oqibatida vafot etdi.
Farg‘ona viloyatining Uchko‘prik tumanida «Inson» ijtimoiy xizmatlar markazining 34 yoshli xodimi Tohirjon Jo‘rayev tuman hududini obodonlashtirish va tozalash ishlariga jalb qilingan vaqtida fojiali tarzda halok bo‘ldi.
Manbalarga ko‘ra, ko‘ngilsiz hodisa 29-iyul kuni tumanining Qo‘qonboy hududida sodir bo‘lgan. Markaz xodimlari hududni tozalash va ko‘kalamzorlashtirish ishlariga chiqarilgan bo‘lgan.
Maysalar o‘rilayotgan vaqtida o‘t o‘radigan burchakkesar (trimmer) uskunalarining o‘tkir tig‘li moslamasi uzilib ketgan va atrofdagi 34 yoshli xodimning yurak qismiga borib sanchilgan. Olingan og‘ir tan jarohati oqibatida Tohirjon Jo‘rayev voqea joyida vafot etgan.
Hodisa joyiga Ijtimoiy himoya milliy agentligi direktori Mansur Olloyorov yetib borgani hamda marhumning oila a’zolari va yaqinlari bilan uchrashgani aytilmoqda.
Marhumning hamkasblari va jamoatchilik vakillari byudjet tashkilotlari xodimlarini majburiy mehnat hamda obodonlashtirish ishlariga noqonuniy jalb etish amaliyotini keskin qoralab, ushbu holat bo‘yicha mas’ullarga nisbatan huquqiy chora ko‘rilishini talab qilmoqda.
Izohlar
Hozircha izohlar yo‘q