Tehron vositachilar orqali Vashingtonga urushni yakunlash va Hormuz bo‘g‘ozini blokadadan chiqarish bo‘yicha taklif yo‘lladi. Biroq Eron yadro dasturi bo‘yicha muzokaralarni keyinroqqa qoldirishni shart qilib qo‘ymoqda.
Eron rahbariyati mintaqadagi keskinlikni yumshatish bo‘yicha yangi tashabbus bilan chiqdi va o‘z takliflarini Pokiston vositachiligida Oq uyga yetkazdi. Tehron Hormuz bo‘g‘ozini xalqaro kemalar harakati uchun to‘liq ochishga hamda uzoq muddatli o‘t ochishni to‘xtatish yoki to‘liq tinchlik shartnomasini imzolashga tayyorligini bildirdi. Eronning asosiy sharti — mamlakat portlari blokadasini yechish va neft eksportini tiklash imkoniyatini berishdir.
Biroq taklifda muhim bir jihat bor Tehron yadro dasturi bo‘yicha muzokaralarni ancha kechroq muddatga qoldirishni so‘ramoqda. Bu Donald Tramp ma’muriyatining qat’iy talablariga zid keladi. AQSH Erondan uranni boyitishni kamida 10 yilga to‘xtatishni va uning zaxiralarini mamlakatdan olib chiqib ketishni talab qilmoqda.
Vaziyat Eron rahbariyati ichida yakdil fikr yo‘qligi bilan yanada murakkablashmoqda. Ma’lumotlarga ko‘ra, Eron tashqi ishlar vaziri Abbos Aroqchi Islomoboddagi uchrashuvlarda Tehron AQSH ulytimatumlariga qanday javob qaytarish borasida hali bir to‘xtamga kelmaganini ochiqlagan. Eron rejasining qabul qilinishi Vashingtonni asosiy bosim vositasi bo‘lgan iqtisodiy blokadadan mahrum qilishi mumkin, shu sababli Oq uy hozircha aniq javob bermadi. Donald Tramp ushbu masalani 27-aprel kuni Oq uyning Maxsus xonasida o‘tkaziladigan yig‘ilishda muhokama qilishi kutilmoqda.
