AQSH prezidenti Donald Tramp o‘z surati va imzosi tushirilgan esdalik pasportini taqdim etdi. AQSH G‘aznachiligi esa Tramp tasvirlangan 250 dollarlik kupyura chiqarmoqchi.
AQSH prezidenti Donald Tramp 26-iyun kuni mamlakat mustaqilligining 250 yillik yubileyiga bag‘ishlab maxsus tayyorlangan cheklangan miqdordagi (limited edition) yangi pasport namunasini keng jamoatchilikka taqdim etdi. Mazkur esdalik sayohat hujjatining o‘ziga xosligi shundaki, unda prezidentning shaxsiy surati joylashtirilgan. Bu haqda CNN telekanali xabar berdi.
Tramp o‘zining Truth Social ijtimoiy tarmog‘idagi sahifasida yangi pasport maketini joylashtirar ekan, unga quyidagicha izoh qoldirdi:
“AQSHning yangi pasporti. Unda ‘Xush kelibsiz, ammo o‘zingizni yaxshi tuting!’ deb yozilgan”, — deya post qoldirdi Oq uy rahbari.
Prezident e’lon qilgan rasmiy namunada uning Oq uydagi Oval kabinetda, mashhur “Rezolyut” stoli ortida turgan surati aks etgan. Suratning fon qismida AQSH Mustaqillik deklaratsiyasining asl qo‘lyozma matni sharpa ko‘rinishida berilgan, pastki qismiga esa Donald Trampning shaxsiy imzosi tushirilgan. Pasportning qarama-qarshi sahifasida esa rassom Jon Trambull tomonidan chizilgan mashhur “Mustaqillik deklaratsiyasi” kartinasi tasvirlangan.
Ekspertlar tahliliga ko‘ra, pasportdagi Trampning surati Vashingtondagi Smitson milliy portret galereyasida saqlanayotgan rasmiy portret asosida ishlangan. Ushbu yakuniy dizayn Davlat departamenti 2026-yil boshida taqdim etgan dastlabki variantlardan sezilarli darajada farq qiladi. 26-iyun kuni kechroq Oq uyning X (Twitter) tarmog‘idagi rasmiy sahifasida ham ushbu maket “Amerikaning 250 yilligiga bag‘ishlangan yangi AQSH pasporti” sarlavhasi ostida e’lon qilindi. Oq uy matbuot xizmati jurnalistlarning bu yakuniy rasmiy variantmi degan savollarini Davlat departamentiga yo‘naltirdi.
Ushbu ekskluziv esdalik hujjati ilk bor aprel oyida, yubiley tadbirlari dasturi doirasida e’lon qilingan edi. O‘shanda Davlat departamenti vakili CNN telekanaliga yangi dizayndagi pasportni tarqatish tartibini tushuntirib bergan:
-
Mazkur hujjat faqatgina Vashingtondagi markaziy pasport agentligiga shaxsan borib, o‘z pasportini yangilagan AQSH fuqarolarigagina standart variant sifatida taqdim etiladi.
-
Arizasini onlayn tarzda topshirgan yoki mamlakatning boshqa shtatlarida istiqomat qiladigan fuqarolar uchun esa amaldagi eski klassik pasport dizayni o‘zgarishsiz qoldiriladi.
Ma’lumot o‘rnida, hozirgi standart AQSH pasportining ichki muqovasida rassom Persi Moranning surati hamda Frensis Skott Keyni AQSH madhiyasini yozishga ilhomlantirgan Fort-Makenri jangi tasviri aks ettirilgan.
Donald Tramp ma’muriyati faqat pasport bilan cheklanib qolmoqchi emas
. AQSH Moliya vazirligi (G‘aznachiligi) shu yilning may oyida markazida Donald Tramp surati tushirilgan mutlaqo yangi — 250 dollarlik banknotani muomalaga chiqarish g‘oyasini ilgari surgan edi.
