Dominikan Respublikasining Bayaxibe kurortidagi Viva Wyndham mehmonxonasida yirik yong‘in chiqdi. Italiyalik ayol halok bo‘ldi, minglab sayyohlar evakuatsiya qilindi.
Reuters agentligining mahalliy xizmatlarga tayanib xabar berishicha, alanga oqibatida 46 yoshli italiyalik sayyoh ayol Francheska Valentino hayotdan ko‘z yumdi. Favqulodda vaziyatlar xodimlari hududdan qariyb 1700 nafar turistik jamoani zudlik bilan xavfsiz joyga ko‘chirishga muvaffaq bo‘lishdi.
Tibbiyot va qutqaruv xizmatlarining ma’lumotlariga ko‘ra, yong‘in oqibatida yana 3 kishi shifoxonaga yotqizilgan, 6 nafar fuqaroga esa voqea joyining o‘zida birinchi tibbiy yordam ko‘rsatilgan. Jabrlanganlar orasida mehmonxona mijozlari va qutqaruvchilar bor. Mahalliy OAVda tarqalgan videotasvirlarda Karib dengizi qirg‘oqlari uzra ulkan qora tutun ko‘tarilgani hamda olov binolarning somonli tomlarini tezlikda qamrab olgani aks etgan.
Dominikan Respublikasi Favqulodda operatsiyalar markazi (COE) dastlabki surishtiruvida binolarning tomi palma barglaridan yopilgani va kuchli shamol sababli yong‘in soniyalar ichida tarqalib ketganini ma’lum qildi. Evakuatsiya qilingan sayyohlar yaqin atrofdagi boshqa mehmonxonalarga joylashtirildi.
Rasmiylar Bayaxibe hududida turizm infratuzilmasi odatdagi tartibda ishlayotganini va hech qanday cheklovlar kiritilmaganini bildirishdi. Ma’lumot o‘rnida, Dominikan Karib havzasining eng yirik turistik markazi bo‘lib, dastlabki besh oyda u yerga 5,6 million sayyoh tashrif buyurgan.
