Darknet tarmog‘ida Qozog‘iston aholisining 75 foiziga tegishli shaxsiy ma’lumotlar bazasi sotilmoqda. Xaker 2,7 Gb hajmdagi ma’lumotlar uchun 0,5 bitkoin so‘ramoqda va buzg‘unchilik eGov servisi orqali sodir etilganini da’vo qilmoqda.
Darknet maxfiy tarmog‘ida Qozog‘istonning 15 million nafar aholisiga tegishli shaxsiy ma’lumotlar bazasi sotuvga chiqarildi. Bu mamlakat umumiy aholisining deyarli uchdan to‘rt qismini tashkil etadi, deb xabar bermoqda Ulysmedia.kz.
Noma’lum xaker shiddat bilan tarqalayotgan ushbu bazada 47 million satrdan iborat ma’lumotlar jamlanganini va fayl hajmi 2,7 Gigabaytni tashkil qilishini bildirgan. Sotuvchining ta’kidlashicha, fayllar orasida fuqarolarning pasport ma’lumotlari, telefon raqamlari, elektron pochtalari, parollari, ish joylari haqida ma’lumotlar va hattoki hujjatlarning skaner qilingan nusxalari bor.
Buzg‘unchi butun baza uchun 0,5 bitkoin (taxminan 32 ming dollar) so‘ramoqda. U ushbu ma’lumotlarni eGov davlat xizmatlari portalidagi zaiflik sababli qo‘lga kiritganini da’vo qilmoqda, biroq hozircha bu vijdonsiz da’vo rasman o‘z tasdig‘ini topmagan. Qozog‘iston Sun’iy intellekt va raqamli rivojlanish vazirligi holatga aniqlik kiritishga kirishgan.
Eslatib o‘tamiz, bu qo‘shni mamlakatda sodir bo‘layotgan birinchi yirik sizdirish emas: 2025-yilning yozida ham 16,3 million dona shaxsiy ma’lumotlar ochiq tarmoqqa chiqib ketgan edi. O‘shanda rasmiylar bu holat to‘g‘ridan-to‘g‘ri tizimni buzib kirish emas, balki qonuniy akkauntlarning parollari o‘g‘irlanishi yoki uchinchi shaxslarga berilishi oqibatida yuz berganini bildirishgan edi.
Izohlar
Hozircha izohlar yo‘q