Chirchiq shahrida 73 yoshida Natalya Salimonova vafot etdi. O‘limidan oldin u IIB boshlig‘iga tushuntirish xati yozib, mahalla raisi va uchastka inspektori tomonidan mushuklarni boqqani uchun tazyiqqa uchraganini bildirgan.
Murojaat matniga ko‘ra, mahalla raisasi va hududiy profilaktika inspektori (uchastka noziri) keksayib qolgan ayolga uydan olisroq joyda bo‘lsa ham, uysiz mushuklarga suv va yem berishni qat’iy taqiqlab qo‘ygan.
Natalya Salimonovaning ta’kidlashicha, ushbu taqiqdan so‘ng qo‘shni uyda yashovchi fuqarolar uni rasmga olish va kuzatishni boshlagan, oqibatda u bir necha kunlab o‘z xonadonidan tashqariga chiqa olmagan.
Natalya Salimonovaning Chirchiq shahar IIB boshlig‘i nomiga yozgan tushuntirish xatidan:
«Men keksa ayolman, endi yer haqida emas, osmon haqida o‘ylayapman. Uysiz mushuklarga juda achinaman va ularni qanday xafa qilishayotganini ko‘raman: tepishadi, tosh otishadi, ularni himoya qiladigan hech kim yo‘q. Men ularga rahm qilganimdan pensiya pulimdan yem berib yurardim. Ammo 21-sonli mahalla raisasi uchastka noziri bilan kelib, uydan uzoqda bo‘lsa-da: “Suv ham, yem ham bermaysiz”, deb vaqronalik bilan taqiqlab ketishdi. Shundan so‘ng meni kuzatish boshlandi. 7a-uyda yashovchilar ko‘cha mushugiga yem berib qo‘ymayapmanmi deb, telefon bilan orqamdan yugurib rasmga olishga urinishdi. Kuzatuvlar sabab bir necha kunlab kvartiramdan chiqa olmay o‘tirdim. Mushuklar ham qolmadi, hammasi qochib ketdi».
Keksa ayolning vafoti haqidagi xabar ijtimoiy tarmoqlar va hayvonlarni muhofaza qilish tashkilotlari vakillari orasida keskin e’tirozlarga sabab bo‘ldi. Hozircha mahalla va huquq-tartibot idoralari vakillarining ushbu harakatlari yuzasidan rasmiy munosabat berilgani yo‘q.
