FQB direktori Kesh Patel Jahon chempionati o‘yinlari o‘tkazilayotgan shahar va stadionlar yaqinidagi taqiqlangan hududlarda 400 dan ortiq dronni tutib olinganini ma’lum qildi.
Amerika Qo‘shma Shtatlari huquq-tartibot idoralari hamda maxsus xizmatlari futbol bo‘yicha Jahon chempionati o‘yinlari o‘tkazilayotgan hududlarda xavfsizlik choralarini maksimal darajaga ko‘tardi. Federal qidiruv bürosi (FQB) direktori Kesh Patelning ma’lum qilishicha, bugungi kunga qadar cheklangan va parvozlar taqiqlangan havo hududlarida noqonuniy uchirilgan 400 dan ortiq uchuvchisiz uchish qurilmalari (dronlar) aniqlanib, davlat foydasiga musodara qilingan.
Bu haqda FQB rahbari o‘zining X (sobiq Twitter) ijtimoiy tarmoqdagi rasmiy sahifasida ma’lum qildi. Patelning qayd etishicha, ayni paytda Jahon chempionati bahslariga mezbonlik qilayotgan barcha AQSH shaharlarida dronlarni masofadan turib tutib olish va ularning signallarini bloklashga ixtisoslashgan maxsus mobil guruhlar safarbar etilgan. Xususan, o‘tgan yakshanba kuni Mayami shahrida FQB xodimlari tomonidan yettita uchuvchisiz qurilma musodara qilingan bo‘lsa, yana shuncha miqdordagi dronlar muxlislar uchun tashkil etilgan FIFA fan-zonasidagi ommaviy tadbirlar vaqtida havoda zararsizlantirilgan.
Ma’lumot o‘rnida, futbol bo‘yicha tarixiy va keng ko‘lamli 2026-yilgi Jahon chempionati bahslari joriy yilning 11-iyunidan 19-iyuliga qadar Shimoliy Amerikaning uchta davlati — AQSH, Kanada va Meksika yashil maydonlarida bo‘lib o‘tmoqda. Mazkur nufuzli mundialning amaldagi g‘olibi va amaldagi chempioni Argentina milliy terma jamoasi hisoblanadi.
