Qora dengizning Anapa qirg‘oqlari yaqinida neft mahsulotlarining keng ko‘lamli sizib chiqishi oqibatida mudhish ekologik holat yuzaga keldi. Dengiz yuzasini qoplagan zaharli qatlamni tozalash uchun 1100 nafardan ortiq xodim va yuzlab texnikalar safarbar etilgan.
Fojia ko‘lami shunchalik kengki, hozirgacha 500 ga yaqin neftga botgan dengiz qushlari reabilitatsiya markazlariga yetkazilgan, biroq ularning omon qolish ehtimoli juda past baholanmoqda.
Voqea sabablari bo‘yicha turlicha taxminlar ilgari surilmoqda. Rossiya rasmiylari neft tankeriga dronlar hujum qilganini da’vo qilayotgan bo‘lsa, mustaqil ekologlar sun’iy yo‘ldosh tasvirlariga tayanib, ifloslanish Rossiya bayrog‘i ostidagi «Sofia» kemasidagi nosozlik tufayli kelib chiqqanini aytmoqda. Greenpeace ma’lumotlariga ko‘ra, neft qatlamlari dengiz oqimi bilan bir necha yuz kvadrat metr maydonga tarqalib ulgurgan.
