Amerika hukumati mustaqillik yubileyiga bag‘ishlangan maxsus pasportlar seriyasini tayyorlamoqda. Yangi hujjatning ichki muqovasida prezident portreti va tilla rangdagi imzosi aks etadi. Bu AQSH tarixidagi eng yirik dizayn islohotlaridan biri bo‘lishi kutilmoqda.
Taqdim etilgan loyihaga ko‘ra, mamlakatning asosiy shaxsni tasdiqlovchi hujjati — pasportning yangi yubiley nashri amaldagi prezident Donald Tramp timsoli bilan boyitiladi. Kelishilgan tartibga binoan, bunday eksklyuziv hujjatlar Vashingtondagi bosh pasport idorasi tomonidan taqdim etiladi. Onlayn buyurtma bergan yoki boshqa shtatlardagi idoralarga murojaat qilgan fuqarolar esa hozircha odatiy ko‘rinishdagi hujjatlarni olishda davom etadilar.
Hujjatning ichki bezagi alohida e’tiborga loyiq: muqova qismida prezidentning rasmiy portreti va uning oltin harflar bilan tushirilgan imzosi joy oladi. Orqa muqovadan esa mamlakat tarixidagi muhim pallani aks ettiruvchi Jon Trambullning “Mustaqillik deklaratsiyasi” asari o‘rin oladi. Hozirgi kunda amalda bo‘lgan standart pasportlarda esa butunlay boshqa tarixiy voqelik — Fort-Makgenri mudofaasi va AQSH madhiyasi yaratilishiga sabab bo‘lgan voqealar tasvirlangan.
Ushbu qadam mustaqillik bayrami oldidan rejalashtirilgan yagona yangilik emas. AQSH moliya tizimida ham o‘zgarishlar kutilmoqda: xususan, oxirgi 165 yil ichida ilk bor 100 dollarlik banknotlarda davlat rahbarining surati paydo bo‘lishi muhokama qilinmoqda. Shuningdek, maxsus komissiya Tramp tasviri va an’anaviy “Liberty” yozuvi tushirilgan oltin tangalarni zarb etishga ham ruxsat bergan. Bu choralar AQSHning chorak ming yillik to‘yiga tayyorgarlikning muhim ramziy qismi sifatida ko‘rilmoqda.
