«Milliy tiklanish» partiyasi rahbari Alisher Qodirov Namangandagi fojia ortidan pedofillar va bolalar qotillari uchun o‘lim jazosini qo‘llash zarurligini bildirdi.
Deputat o‘z bayonotida xalqaro ikki xil standartlarga ergashishni va jinoyatchilarga nisbatan shafqat qilishni tanqid qildi. Qodirovning ta’kidlashicha, bunday toifadagi jinoyatchilar jamiyat uchun doimiy xavf tug‘diradi va ularni uzoq muddatga ozodlikdan mahrum etish tarbiyalamaydi, aksincha, kelgusida yangi og‘ir jinoyatlar sodir etilishi xavfini oshiradi.
Bolalarga nisbatan tajovuz qilgan shaxslar va pedofillar qamoqda aslo tuzalmaydi, ularning tirik qolishi esa yangi jinoyatlar uchun rag‘bat bo‘lib xizmat qiladi.
Qonunchilik tashabbusi va O‘zbekistonda o‘lim jazosining bekor qilinish tarixi
Partiya etakchisining ushbu chiqishi Prezident Administratsiyasi rahbari Saida Mirziyoyevaning Namangandagi fojia ortidan bergan bayonotidan so‘ng voyaga yetmaganlarga nisbatan zo‘ravonlik uchun javobgarlikni keskinlashtirish bo‘yicha boshlangan muhokamalarning mantiqiy davomi bo‘ldi.
Avvalroq Administratsiya rahbari ham barcha mas’ullarni eng og‘ir javobgarlikka tortish hamda qonunchilikka tegishli o‘zgartirishlar kiritish taklif qilinganini bildirgan edi.
Ma’lumot uchun, O‘zbekistonda o‘lim jazosi 2008-yilning 1-yanvaridan rasman bekor qilingan bo‘lib, uning o‘rniga favqulodda jazo chorasi sifatida umrbod ozodlikdan mahrum qilish jazosi joriy etilgan, biroq Namangandagi voqea fonida siyosatchilar va jamoatchilik pedofillar uchun jazo choralarini qayta ko‘rib chiqish masalasini yana kun tartibiga qo‘ymoqda.
