Vazirlar Mahkamasi soliq nazorati tadbirlarini videoga olish qoidalarini belgiladi. Xodimlar soni, kassa va terminal operatsiyalari endi tasvirga tushiriladi. Tasvirga olish tadbirkor ishiga xalaqit bermasligi shart.
Hukumat qarori bilan soliq organlari xodimlarining tadbirkorlik sub’ektlarida o‘tkazadigan tekshiruvlarini videotasvirga olish mexanizmi joriy etildi. Endilikda nazorat tadbiri boshlanishidan avval soliq idorasi rahbariyati tasvirga olish bo‘yicha alohida ko‘rsatma berishi shart.
Yangi tartibga ko‘ra, soliqchilar ob’ektlarni xatlovdan o‘tkazish, tushumni aniqlash (xronometraj) va xodimlarning haqiqiy sonini hisob-kitob qilish jarayonlarini kameraga muhrlaydi. Shuningdek, savdo qoidalariga rioya etilishi, terminal va nazorat-kassa texnikasidan foydalanish holatlari ham videonazorat ostida bo‘ladi.
Hujjatda alohida qayd etilishicha, tasvirga olish jarayoni tadbirkorning qonuniy ish faoliyatini to‘xtatib qo‘ymasligi lozim. Tekshiruv yakunlangach, foydalanilgan uskunaning rusumi va seriya raqami dalolatnomaga kiritiladi, videodagi barcha faktlar hujjatlashtiriladi.
Izohlar
Hozircha izohlar yo‘q