Afg‘onistonda bir necha haftalik suv toshqinlari oqibatida 99 kishi halok bo‘ldi. 3600 dan ortiq uy vayron bo‘lib, ekin maydonlari suv ostida qoldi.
Amu TV xabariga ko‘ra, tabiiy ofat qurbonlari soni 99 kishiga yetgan, yana 150 dan ortiq fuqaro turli darajadagi tan jarohatlari olgan. Toshqinlar mamlakatning deyarli barcha hududlarini, jumladan Kobul, Qandahor va Hirot kabi yirik shaharlarni ham chetlab o‘tmadi.
Tabiiy ofat keltirgan zarar ko‘lami:
-
Turar joylar: 3600 dan ortiq xonadon butunlay vayron bo‘lgan yoki jiddiy shikastlangan, minglab odamlar boshpanasiz qolgan.
-
Qishloq xo‘jaligi: 2300 gektardan ziyod ekin maydonlarini suv yuvib ketgan, bu esa oziq-ovqat xavfsizligiga tahdid solmoqda.
-
Infratuzilma: 330 kilometrdan ortiq avtomobil yo‘llari yaroqsiz holga kelgan, bu esa qutqaruv ishlari va insonparvarlik yordami yetkazishni qiyinlashtirmoqda.
Mahalliy aholi oziq-ovqat va toza ichimlik suvi tanqisligidan shikoyat qilmoqda. Nangarhor viloyati kabi eng ko‘p zarar ko‘rgan hududlarda odamlar bor-budidan ayrilganini, biroq yordam yetib kelmayotganini ta’kidlamoqda. Vaziyatni 3-aprel kuni sodir bo‘lgan va Afg‘onistonning bir qancha hududlarida (shuningdek, O‘zbekistonda ham sezilgan) qayd etilgan zilzila yanada murakkablashtirgan — yer silkinishi oqibatida 9 kishi hayotdan ko‘z yumgan edi.
Hozirda hududlarda tiklash ishlari olib borilayotgani aytilmoqda, biroq talofatlar ko‘lami kengligi sababli xalqaro yordamga ehtiyoj ortib bormoqda.
Izohlar
Hozircha izohlar yo‘q