Qo‘rg‘ontepa tumanidagi “G‘amxo‘rlik” markazida bolalarga jismoniy zo‘ravonlik ishlatgani aniqlangan 6 tarbiyachi va 1 hamshira bo‘shatildi. Bolalar tibbiy ko‘rikdan o‘tkazildi.
Andijon viloyatining Qo‘rg‘ontepa tumanida joylashgan Nogironligi bo‘lgan bolalar uchun “G‘amxo‘rlik” markazida tarbiyalanuvchilarga nisbatan jismoniy zo‘ravonlik qo‘llanilgani aniqlandi. Bu haqda Ijtimoiy himoya milliy agentligi ma’lum qildi.
Tekshiruv natijalari va ko‘rilgan choralar
Ijtimoiy tarmoqlarda bolalarga nisbatan shafqatsiz munosabat aks etgan videolar tarqalgach, Ijtimoiy himoya milliy agentligining Andijon viloyati boshqarmasi tomonidan zudlik bilan tezkor o‘rganish ishlari olib borildi.
Video lavhalarda aks etgan 6 nafar tarbiyachi va 1 nafar hamshira egallab turgan lavozimidan ozod etildi hamda ular bilan tuzilgan mehnat shartnomalari bekor qilindi.
Tarbiyachilar faoliyatini yetarlicha nazorat qilmagan muassasa mas’ullariga nisbatan intizomiy jazo choralari qo‘llanildi.
Tuman tibbiyot birlashmasi mutaxassislari jalb qilingan holda markazning barcha tarbiyalanuvchilari tibbiy ko‘rikdan o‘tkazildi. Shuningdek, o‘yin maydonchalariga qo‘shimcha kuzatuv kameralari o‘rnatildi.
O‘zbekistonda bolalarga nisbatan zo‘ravonlik va beparvolik holatlari haqida xabar berish uchun 1246 qisqa raqamli ishonch telefoni faoliyat yuritmoqda.
Izohlar
Hozircha izohlar yo‘q