O‘zbekiston energetika infratuzilmasini modernizatsiya qilish uchun 8 mlrd dollar kerak. Bu haqda Shavkat Mirziyoyev mamlakatning 2026-yil birinchi yarim yilligidagi ijtimoiy-iqtisodiy rivojlanish yakunlariga bag‘ishlangan yig‘ilishda ma’lum qildi.
Prezidentning aytishicha, yaqin o‘n yil ichida energetika tarmog‘ini yangilash uchun qariyb 8 milliard dollar investitsiya jalb etilishi zarur. Qo‘shimcha xarajatlarning asosiy sabablaridan biri elektr energiyasi va tabiiy gazdagi yuqori yo‘qotishlar bo‘lib qolmoqda.
Joriy yilning dastlabki olti oyida elektr tarmoqlaridagi yo‘qotishlar 17,2 foizga yetib, 4,8 milliard kVt·soatni tashkil etdi. Tabiiy gaz yo‘qotishlari esa 7,6 foiz yoki 797 million kub metrni tashkil qilgan.
Davlat rahbari yo‘qotishlarni kamaytirish bo‘yicha amalga oshirilayotgan ishlar kutilgan natijani bermayotganini ta’kidladi. Uning so‘zlariga ko‘ra, aynan shu yo‘nalishda samaradorlikni oshirish energetika sohasining daromadlarini sezilarli ko‘paytirishi mumkin.
Mirziyoyev hududiy gaz tarmoqlari korxonalarida mehnat unumdorligi ham pastligicha qolayotganiga e’tibor qaratdi. Prezidentning ta’kidlashicha, bu ko‘rsatkich qo‘shni davlatlarga nisbatan 1,5–2 baravar past bo‘lib, boshqaruv samaradorligini oshirish va energetika infratuzilmasini modernizatsiya qilishni jadallashtirishni talab etadi.
Izohlar
Hozircha izohlar yo‘q