Hukumat zargarlik buyumlarini bosqichma-bosqich majburiy raqamli markirovkalash tizimiga o‘tkazishni rejalashtirmoqda. Tegishli qaror loyihasi jamoatchilik muhokamasiga qo‘yildi.
Mazkur yangilikdan ko‘zlangan asosiy maqsad — zargarlik buyumlari aylanmasining aniq hisobini yuritish, sohadagi nazorat mexanizmlarini tubdan takomillashtirish, qonunbuzuqlik va noqonuniy aylanmalarning oldini olish hamda xaridorlarga ishonchli mahsulotlar yetkazib berishdan iborat.
Islohot bir necha bosqichda amalga oshiriladi. Unga ko‘ra, dastlab “Vaqtinchalik nizom” asosida raqamli markirovkalash bo‘yicha tajriba loyihasi yo‘lga qo‘yilib, u 2027-yil 30-dekabrga qadar davom etadi. Shundan so‘ng, tajriba natijalari asosida 2028-yil 1-iyulgacha yakuniy normativ-huquqiy hujjat loyihasi ishlab chiqiladi va Vazirlar Mahkamasiga kiritiladi.
2029-yil 1-yanvardan boshlab esa zargarlik buyumlarini ishlab chiqarish va import qilish bilan shug‘ullanuvchi barcha tadbirkorlik subyektlari uchun raqamli markirovka mutloq majburiy etib belgilanadi. Tovar aylanmasining barcha bosqichlarini kuzatish to‘g‘risidagi ma’lumotlar CRPT Turon kompaniyasining “Asl belgisi” milliy axborot tizimida jamlanadi. Qaror loyihasi muhokamasi joriy yilning 21-iyuliga qadar davom etadi.
