O‘zbekiston Prezident Shavkat Mirziyoyevga davlat boshqaruvining yagona raqamli platformasi taqdimoti namoyish etildi. Sun’iy intellekt asosida ishlaydigan tizim joriy yilda Toshkentda, keyingi yildan esa barcha hududlarda yo‘lga qo‘yiladi.
Yangi platforma sun’iy intellekt yordamida hududlardagi muammolarni oldindan aniqlash, iqtisodiyot, investitsiya va geofazoviy ma’lumotlarni tahlil qilish imkonini beradi.
Tizim joriy yilda poytaxtda sinovdan o‘tkazilib, kelgusi yildan boshlab respublikaning barcha hududlariga tatbiq etiladigan bo‘ldi. Shuningdek, bojxona va soliq idoralari uchun yagona milliy tasniflagich hamda chet el tizimlariga qaramlikni kamaytiradigan milliy navigatsiya tizimi yaratiladi.
Taqdimotda IT-xizmatlar eksportini 2030-yilgacha 5 milliard dollarga yetkazish va IT-Park rezidentlari xodimlari uchun soliq imtiyozlarini 2040-yilgacha uzaytirish rejalari ko‘rib chiqildi. Xorijiy mutaxassislar uchun masofadan korxona ochish va bank kartalarini rasmiylashtirish imkonini beruvchi “Talent Hub” dasturi ishga tushiriladi.
Aloqa infratuzilmasini yaxshilash maqsadida telekommunikatsiya tarmoqlarini loyihalash litsenziyalari muddati 25 kundan 10 ish kuniga qisqartiriladi va yangi qurilayotgan ko‘p qavatli uylarni yuqori tezlikdagi internet bilan topshirish majburiy etib belgilanadi. Bundan tashqari, chekka hududlarda ushbu biznesni boshlamoqchi bo‘lgan yoshlarga “Kelajak tadbirkori” dasturi doirasida 15 foizlik stavka bilan 530 million so‘mgacha imtiyozli kreditlar ajratiladi.
Izohlar
Hozircha izohlar yo‘q