Jahon sog‘liqni saqlash tashkiloti rahbari “Hondius” kruiz kemasida tarqalgan hantavirus infeksiyasi butunlay bartaraf etilganini ma’lum qildi. “Andes” virusi oqibatida 3 nafar yo‘lovchi halok bo‘lgan edi.
Tashkilot rahbariyatining bildirishicha, virus yuqtirgan bemorlar bilan muloqotda bo‘lgan eng so‘nggi yo‘lovchi ham majburiy karantin muddatini to‘liq o‘tab bo‘lgan. Uning hantavirusga topshirgan laboratoriya testi salbiy natija ko‘rsatgach, fuqaroga uyiga qaytishga ruxsat berildi. Joriy yilning 25-mayidan buyon kemadagi holat bo‘yicha yangi kasallanish holatlari qayd etilmadi.
Ushbu xavfli epidemiya 2026-yilning aprel-may oylarida, “Hondius” sayohat kemasining Atlantika okeani bo‘ylab kruizga chiqqan vaqtida boshlangan edi. Kema Argentina portidan yo‘lga chiqqanidan 10 kun o‘tib, 11-aprelda bortdagi Niderlandiya fuqarosi vafot etgan, keyinchalik uning turmush o‘rtog‘i va yana bir germaniyalik sayyoh ham infeksiya qurboniga aylangan. Sayohat boshida bortda 20 dan ortiq davlatdan kelgan jami 175 yo‘lovchi bo‘lgan. Aprel oyi oxirida kemadan qirg‘oqqa tushgan 34 kishining ba’zilarida virus aniqlangan, qolganlar esa Tenerife oroliga yetib kelgach, karantin o‘tash uchun o‘z mamlakatlariga evakuatsiya qilingan edi.
Tibbiyot mutaxassislarining ta’kidlashicha, ushbu epidemiya odamdan odamga yaqin muloqot orqali yuqadigan yagona shtamm — “Andes” virusi tufayli kelib chiqqan. Kasallik tarqalishi oqibatida jami 13 kishi virusni yuqtirgan, ulardan 3 nafari hayotdan ko‘z yumdi.
Izohlar
Hozircha izohlar yo‘q