Prezident Shavkat Mirziyoyev 30-iyun kuni Olimpiya shaharchasida Yoshlar kuni munosabati bilan tashkil etilgan maxsus koʻrgazmaga tashrif buyurdi va mamlakatning faol, izlanuvchan yoshlari bilan uchrashdi.
Davlat rahbari yoshlarning mahalla hayoti, ekologiya, startaplar, muhandislik, IT va kitobxonlik madaniyatini yuksaltirishga qaratilgan innovatsion loyihalari bilan yaqindan tanishib, loyiha mualliflari bilan shaxsan muloqot qildi hamda ularning tashabbuslarini to‘liq qo‘llab-quvvatladi.
Koʻrgazmaning startaplar maydonida yoshlarning xalqaro miqyosda tan olingan intellektual salohiyati namoyish etildi. Xususan, 18 yoshli Asilbek Ashurov oʻzi asos solgan, sunʼiy intellektga tayanuvchi “Makon AI” ta’lim platformasi AQSh va Yaqin Sharq bozori investorlaridan 380 ming dollar sarmoya jalb etgani va loyiha qiymati 3 million dollarga baholanganini soʻzlab berdi. Shuningdek, dunyoning eng nufuzli “Y Combinator” akseleratori dasturining birinchi oʻzbek ishtirokchisi Sardorbek Rahmatulloyevning muvaffaqiyatlari ham milliy startap ekotizimining katta yutug‘i sifatida e’tirof etildi. Prezident bunday yuqori texnologiyali loyihalarni mamlakatda keng joriy etishga davlat tomonidan katta ko‘mak berilishini aytdi.
Muhandislik va innovatsiyalar yoʻnalishida esa sunʼiy intellekt hamda robototexnika sohasidagi muvaffaqiyatlar koʻrib chiqildi. Turin politexnika universiteti talabasi Biloliddin Ismoilov mahalliy antidron (dronlarga qarshi) tizimlarini yaratish ustida ishlayotganini ma’lum qilgan bo bo‘lsa, Nukus yoshlar texnoparki rezidenti Ayzada Asanova “Yangi avlod avtomobillari” yo‘nalishidagi loyihasini taqdim etdi. Aholi o‘rtasida mutolaani targ‘ib qiluvchi, 5 million marta yuklab olingan “Mutolaa” mobil ilovasi hamda imkoniyati cheklangan bolalar uchun yaratilgan “Oʻqi va yuksal” loyihalari ham davlat rahbarining yuksak e’tirofiga sazovor bo‘ldi.
Izohlar
Hozircha izohlar yo‘q