Toshkent investitsiya forumida Prezident Shavkat Mirziyoyev mamlakat yerosti boyliklari 3 trln dollarga baholanishini aytdi va investorlar uchun ochiq raqamli baza yaratilishini bildirdi.
Ushbu ulkan salohiyatni xorijiy sarmoyadorlarga namoyish etish maqsadida mamlakatda geologiya ma’lumotlarining ochiq raqamli bazasi shakllantiriladi.
Bundan tashqari, auksion savdolariga chiqariladigan foydali qazilma konlari soni to‘rt barobarga ko‘paytiriladi. Davlat rahbarining so‘zlariga ko‘ra, xomashyoni chuqur qayta ishlash loyihalarini rivojlantirish uchun Toshkent va Samarqandda tashkil etilayotgan «Kelajak metallari» texnoparklariga chet el investitsiyalari faol jalb etiladi.
Shuningdek, forum doirasida investorlarga umumiy qiymati 20 milliard AQSH dollariga teng bo‘lgan istiqbolli loyihalar portfeli taklif etildi. Ushbu sarmoyalar mashinasozlik, robototexnika, elektrotehnika, qurilish materiallari, farmatsevtika hamda yengil sanoat kabi ustuvor yo‘nalishlarda tayyor mahsulotlar ishlab chiqarishni yo‘lga qo‘yishga qaratilgan.
