Hormuz bo‘g‘ozining avgustgacha yopiq qolishi jahon bozorida neft tanqisligini keltirib chiqarib, 2008-yil darajasidagi global iqtisodiy inqirozga yetaklashi mumkin.
Rapidan Energy Group tahliliy kompaniyasi mutaxassislarining ogohlantirishicha, Hormuz bo‘g‘ozining uzoq muddatga yopiq qolishi jahon miqyosida 2008-yilgi moliyaviy inqiroz darajasidagi kuchli iqtisodiy pasayishni keltirib chiqarishi mumkin. Bloomberg agentligi taqdim etgan hisobotning bazaviy ssenariysiga ko‘ra, strategik yo‘lak iyul oyida qayta ochilgan taqdirda ham, neftga bo‘lgan global talab sutkasiga o‘rtacha 2,6 million barrelga qisqaradi. Bunday vaziyatda Brent markali xomashyoning yozgi spot narxi bir barrel uchun 130 dollargacha ko‘tarilishi kutilmoqda. Agar cheklovlar uzoqroq davom etsa, ta’minotdagi uzilishlar sababli 2026-yilda jahon bozorida neft iste’molining yillik keskin pasayishi kuzatiladi.
AQSh, Isroil va Eron o‘rtasidagi harbiy-siyosiy ziddiyatlar, global bozorlardagi beqarorlik hamda inflyatsiya xavfi tufayli qora oltin narxi fevral oyi oxiridan buyon deyarli ikki baravarga qimmatlashdi. Tahlilchilar zamonaviy iqtisodiyotlarning neftga qaramligi kamroq ekani va pul-kredit siyosati barqarorligi tufayli joriy holat 1970-yillar yoki 2008-yilgi inqirozlarga qaraganda yengilroq kechayotganini aytishmoqda. Shunga qaramay, agar bo‘g‘oz avgustgacha ochilmasa, uchinchi chorakda kunlik taqchillik 6 million barrelga yetib, zaxiralar kritik darajada kamayadi. Minfin nashrining yozishicha, Vashington va Tehron o‘rtasidagi muzokaralar samarasiz yakunlangach, juma kuni Brent fyucherslari 105,04 dollargacha, WTI esa 98,17 dollargacha ko‘tarildi, ammo haftalik hisobda narxlar turg‘unlik kutilmalari fonida biroz pasayishni qayd etgan.
