O‘zbekiston va Rossiya prezidentlari telefon orqali muloqotda strategik sheriklik hamda tovar ayirboshlash hajmi 23 foizga o‘sganini muhokama qildilar
O‘zbekiston va Rossiya rahbarlari telefon orqali muloqot qify, unda ikki tomonlama hamkorlikning muhim yo‘nalishlari hamda oliy darajada erishilgan kelishuvlarning amaliy ijrosini atroflicha ko‘rib chiqdilar.
Shavkat Mirziyoyev va Vladimir Putin ittifoqchilik munosabatlarini yanada mustahkamlash hamda har tomonlama strategik sheriklikni rivojlantirish masalalariga alohida e’tibor qaratdilar. Davlat rahbarlari parlamentlararo aloqalarning hozirgi holatiga yuqori baho berib, ishbilarmon doiralar hamda madaniy-gumanitar sohalardagi almashinuvlar juda samarali kechayotganini qayd etdilar.
Prezidentlar muvaffaqiyatli iqtisodiy hamkorlikning asosiy ko‘rsatkichi sifatida joriy yil boshidan buyon o‘zaro tovar ayirboshlash hajmi 23 foizga ko‘payganini alohida e’tirof etdilar. Tomonlar energetika sektori, sanoat, transport infratuzilmasi va boshqa ustuvor tarmoqlarni qamrab olgan yirik qo‘shma kooperatsiya loyihalari faol tarzda hayotga tatbiq etilayotganini tasdiqlashdi.
Ushbu tashabbuslarning aksariyati ikki mamlakat hududlari darajasida muvaffaqiyatli amalga oshirilmoqda. Muloqot yakunida Shavkat Mirziyoyev va Vladimir Putin ikki tomonlama hamda ko‘p tomonlama shakldagi bo‘lajak tadbirlar rejasini ham kelishib oldilar.
Izohlar
Hozircha izohlar yo‘q