Senat avtomobil odometri ko‘rsatkichlarini soxtalashtirganlik uchun BHMning 15 baravarigacha jarima solishni ko‘zda tutuvchi qonunni ma’qulladi.
Parlament yuqori palatasi matbuot xizmatining xabar berishicha, avtomobil bozoridagi firbakarlik holatlarining oldini olish maqsadida kodeks yangi 178-2-modda bilan to‘ldirilmoqda. Ushbu moddaga muvofiq, transport vositasining bosib o‘tgan masofasini ko‘rsatuvchi odometr ko‘rsatkichlari o‘zgartirilgani yoki almashtirilgani haqida xaridorga ma’lum qilmaslik ma’muriy javobgarlikka sabab bo‘ladi.
Senatorlar mazkur normaning kiritilishi iste’molchilarning tovar haqida to‘liq va ishonchli ma’lumot olish huquqini ta’minlash hamda ikkilamchi bozordagi insofsiz amaliyotlarga chek qo‘yishga xizmat qilishini ta’kidladilar. Ushbu qoidabuzarlik uchun bazaviy hisoblash miqdorining 10 baravaridan 15 baravarigacha (4,12 million so‘mdan 6,18 million so‘mgacha) miqdorda jarima qo‘llanilishi belgilangan.
Bundan tashqari, ma’qullangan qonun loyihasi bilan transport vositasini boshqarish yoki ov qilish huquqidan mahrum qilish muddatini muddatidan ilgari qisqartirish tartibi ham takomillashtirilmoqda. Endilikda mazkur masala faqat sud organlari tomonidan, aniq belgilangan mezonlar va shartlar asosida ko‘rib chiqiladi.
Agarda huquqbuzar muqaddam ushbu imtiyozdan foydalangan bo‘lsa yoki jazo muddati davomida takroran huquqbuzarlik sodir etgan taqdirda, unga nisbatan jazoni yengillashtirish choralari mutlaqo qo‘llanilmaydi.
Izohlar
Hozircha izohlar yo‘q