O‘zbekistonda dacha”larning elektron bazasini yaratish va ijara narxlarini nazorat qilish rejalashtirilmoqda. Barcha dala hovlilar yagona reyestrga kiritiladi, ijara narxlari shaffoflashadi, noqonuniy ijara haqida xabar berganlarga esa mukofot to‘lanadi.
O‘zbekistonda shahar tashqarisidagi ko‘chmas mulkni qisqa muddatli ijaraga berish bozorini isloh qilishga tayyorgarlik ko‘rilmoqda. Tashabbusdan asosiy maqsad — dala hovli va dam olish maskanlari egalarining daromadlarini legallashtirish hamda raqamli vositalar orqali kelishuvlar shaffofligini ta’minlashdir. Barcha ob’ektlar davlat ma’lumotlar bazasiga kiritish uchun majburiy xatlovdan o‘tkaziladi.
Dala hovlilar va dam olish maskanlari majburiy tartibda raqamlashtiriladi hamda yagona davlat monitoring tizimiga kiritiladi. Bunday elektron reyestrning tashkil etilishi davlatga shahar tashqarisidagi ko‘chmas mulklarning to‘liq hisobini yuritish va ulardan foydalanishni nazorat qilish imkonini beradi.
Ijaraga beriladigan joylarning narxi haqidagi ma’lumotlar maxsus onlayn platformaga joylashtirilishi natijasida ijara bozori shaffoflashadi. 2027-yildan boshlab mulkdorlar tizimga amaldagi narxlarni kiritishga majbur bo‘ladilar, bu esa ob’ektni qonuniy ijaraga berishning rasmiy shartiga aylanadi.
Yashirin iqtisodiyotga qarshi kurashish maqsadida jamoatchilik nazorati uchun rag‘batlantirish tizimi joriy etilmoqda. Noqonuniy ijara holatlari haqida xabar bergan fuqarolar qoidabuzardan undirilgan jarima summasining 30 foizigacha miqdorda mukofot olishlari mumkin. Shu bilan birga, reyestrga kiritilmagan ob’ektlardan tijoriy maqsadlarda foydalanish rasman taqiqlanadi.
