Iqtisodiy tadqiqotlar va islohotlar markazi (ITIM) hisobotiga ko‘ra, 2026-yilning birinchi choragida davlat byudjeti daromadlari 35 foizga o‘sdi. Soliq tushumlari 63,6 trln so‘mni, bojxona to‘lovlari esa 19,4 trln so‘mni tashkil etgan.
ITIMning birinchi chorak yakunlari bo‘yicha e’lon qilgan hisoboti mamlakat iqtisodiyotidagi barqaror o‘sish sur’atlarini tasdiqlamoqda.
Byudjet tushumlarining eng katta qismi soliq organlari hissasiga to‘g‘ri keldi — soliq tushumlari 24 foizga ko‘payib, 63,6 trln so‘mga yetdi. Bojxona to‘lovlari ham sezilarli o‘sish ko‘rsatdi: o‘tgan yilgi 16,2 trln so‘m o‘rniga joriy yilning ilk uch oyida 19,4 trln so‘m yig‘ildi. Bu ko‘rsatkichlar tashqi iqtisodiy faoliyatning jadallashganidan dalolat beradi.
Mahalliy byudjetlar ixtiyorida qolayotgan mablag‘lar miqdori ham ortib bormoqda. Birinchi chorakda hududiy byudjetlarda 2,2 trln so‘m shakllangan bo‘lib, bu o‘tgan yilgidan 21 foizga ko‘proqdir. Qo‘shimcha mablag‘lar hajmi bo‘yicha quyidagi hududlar yetakchilik qilmoqda:
-
Toshkent shahri — 858 mlrd so‘m;
-
Farg‘ona viloyati — 243 mlrd so‘m;
-
Samarqand viloyati — 210 mlrd so‘m.
Hududiy byudjetlarga yer sotish va xususiylashtirishdan 572 mlrd so‘m tushgan bo‘lsa, davlat g‘aznasidan hududlarni qo‘llab-quvvatlash uchun yana 1,1 trln so‘m yo‘naltirildi. Mutaxassislarning ta’kidlashicha, mahalliy byudjetlarning moliyaviy imkoniyatlari kengayishi joylardagi ijtimoiy muammolarni hal etish va infratuzilmani yaxshilash imkonini beradi.
