Rossiya chegarasini kesishda smartfon, noutbuk va ijtimoiy tarmoqlardagi yozishmalarni tekshirish choralari kuchaytirildi. Qurilmani ochib berishdan bosh tortish mamlakatga kirishni taqiqlashga sabab bo‘ladi.
Rossiyaning barcha xalqaro aeroportlari va vokzallarida chegarachilar yo‘lovchilarning shaxsiy elektron qurilmalarini tekshirish amaliyotini faol qo‘llamoqda. Davlat chegarasini kesib o‘tayotgan shaxslardan smartfon, planshet yoki noutbuklarni blokdan chiqarish hamda messenjerlardagi yozishmalar va ijtimoiy tarmoqlardagi sahifalarni ko‘rsatish talab qilinishi mumkin. Ushbu choralar davlat xavfsizligini ta’minlash va shubhali shaxslarni aniqlash maqsadida amalga oshirilmoqda.
Shuni ta’kidlash kerakki, qurilmani blokdan chiqarishdan bosh tortganlik uchun to‘g‘ridan-to‘g‘ri qamoq jazosi nazarda tutilmagan, biroq bu holat chet el fuqarolari uchun jiddiy oqibatlarga olib keladi. Xususan, telefonini ko‘rsatmagan xorijliklarning mamlakatga kirishi taqiqlanadi, ular deportatsiya qilinadi va uzoq muddatga Rossiyaga kelish huquqidan mahrum etiladi. Rossiya fuqarolari uchun esa bunday rad javobi ma’muriy huquqbuzarlik sifatida baholanib, jarima yoki 15 sutkagacha ma’muriy qamoq jazosiga sabab bo‘lishi mumkin.
Izohlar
Hozircha izohlar yo‘q