O‘zbekiston harbiylari AQShdagi nufuzli musobaqada rekord natijalarni qayd etib, mutlaq g‘olibga aylanishdi. Missisipi shtatidagi «Kemp-Shelbi» bazasida bo‘lib o‘tgan «Eng ilg‘or jangchi — 2026» xalqaro turnirida kichik serjant Ilhom Salomov va III darajali serjant Turdimurod Avlayev zafar quchib, musobaqa g‘olibiga aylanishdi.
16-martdan 18-martga qadar davom etgan ushbu nufuzli musobaqada o‘zbekistonlik desantchilar AQSh Milliy gvardiyasining eng sara maxsus bo‘linmalari bilan kuch sinashdilar. Turnir dasturi o‘z ichiga 13 ta o‘ta murakkab bosqichni qamrab olgan bo‘lib, ular orasida quyidagi sinovlar bor edi:
-
Notanish va murakkab hududlarda tungi oriyentirlash;
-
To‘liq anjomlar bilan uzoq masofalarga marsh-yugurish;
-
O‘t ochish qurollarini mahorat bilan qo‘llash va taktik tibbiyot;
-
Jismoniy chidamlilikni sinovdan o‘tkazuvchi kombinatsiyalashgan testlar.
Vatandoshlarimiz nafaqat barcha bosqichlardan muvaffaqiyatli o‘tdilar, balki turnir tarixida kam kuzatiladigan natijalarni qayd etdilar:
-
Marsh-yugurish — 20 kg yuk bilan 20 kilometrlik masofani atigi 1 soat 48 daqiqada bosib o‘tishdi.
-
To‘siqlar yo‘lagi — Turdimurod Avlayev eng murakkab yo‘nalishni 10 daqiqa 34 soniyada yakunladi.
-
Tungi reyd — Ilhom Salomov tungi sharoitda 15 kilometrlik masofani bir soatga qolmay (59 daqiqada) bosib o‘tdi.
O‘zbekiston ushbu xalqaro musobaqalarda 2019-yildan buyon muntazam ishtirok etib, doimiy ravishda sovrinli o‘rinlarni egallab kelmoqda. Joriy yilgi muvaffaqiyat o‘tgan yillardagi zafarlarning mantiqiy davomi bo‘ldi: 2025-yilda ham harbiylarimiz AQShdan oltin medallar va maxsus mukofotlar bilan qaytishgan edi.
Qahramonlarni tantanali kutib olish marosimi 22-mart kuni Toshkent xalqaro aeroportida bo‘lib o‘tadi. Unda barcha xohlovchilar yilning eng sara jangchilarini shaxsan qutlashlari mumkin bo‘ladi.
