O‘zbekiston hukumati pedagoglarni davlat tomonidan qo‘llab-quvvatlashning yangi tartibini tasdiqladi. Unga ko‘ra, uy-joyni ipoteka asosida xarid qilishda boshlang‘ich badalning bir qismi qoplanadi. Mexanizm kamida 15 yillik mehnat stajiga ega oliy malaka toifasidagi o‘qituvchilarga tatbiq etiladi.
Belgilangan qoidalarga muvofiq, davlat ipoteka krediti bo‘yicha boshlang‘ich badalning 25 foizigacha qismini qoplab beradi. Qo‘llab-quvvatlash byudjet mablag‘lari hisobidan amalga oshiriladi va faqat birlamchi uy-joy bozorida kvartira sotib olish holatlariga nisbatan qo‘llanadi.
Subsidiyani quyidagi mezonlarga javob beruvchi pedagoglar olishi mumkin:
— oliy malaka toifasining mavjudligi;
— kamida 15 yillik ish staji;
— ijobiy kredit tarixi;
— ilgari ipoteka subsidiyasini olmagan bo‘lishi.
Imtiyoz bir oila uchun faqat bir marta beriladi. Ariza davlat xizmatlari markazlari yoki Yagona davlat xizmatlari portali orqali topshiriladi. Qog‘oz shaklidagi ma’lumotnomalar talab etilmaydi — axborot davlat bazalari orqali avtomatik tekshiriladi. Qaror ikki ish kuni ichida qabul qilinadi va arizachiga elektron xabarnoma yuboriladi.
Bank ipoteka kreditini o‘zining ichki tartib-qoidalariga muvofiq rasmiylashtiradi, subsidiya mablag‘lari esa faqat boshlang‘ich badalni to‘lash uchun yo‘naltiriladi. Agar badal miqdori kompensatsiyadan ortiq bo‘lsa, farq qarz oluvchi tomonidan qoplanadi. Mablag‘lar moliya tashkiloti so‘rovidan so‘ng besh kun ichida o‘tkaziladi.
Subsidiyadan foydalanish qat’iy maqsadli xarakterga ega. Agar mablag‘lar 30 kun ichida ishlatilmasa, ular har bir kechiktirilgan kun uchun 0,033 foiz penya hisoblangan holda byudjetga qaytariladi. Ipoteka shartnomasi bekor qilinganda yoki sotib olingan uy sotilganda to‘langan summa davlatga qaytariladi.
Rad etish uchun asos bo‘lib noto‘g‘ri ma’lumot taqdim etish, salbiy kredit tarixi, boshqa davlat dasturlarida ishtirok etish yoki moliyalashtirish limiti tugashi mumkin. Qoidabuzarlik aniqlansa, subsidiya bekor qilinadi va arizachi hamda bank belgilangan tartibda xabardor qilinadi.
Ipoteka qo‘llab-quvvatlashidan tashqari, pedagoglar uchun qo‘shimcha ijtimoiy himoya choralar ham ko‘zda tutilgan. Yangi o‘quv yilidan boshlab davlat OTMlarida tahsil olayotgan o‘qituvchilar farzandlariga kontrakt to‘lovining 30 foizi miqdorida chegirma beriladi. Shuningdek, o‘qituvchilarga kompyuter texnikasi xarid qilish uchun 10 mln so‘mgacha imtiyozli kredit ajratiladi.
2026-yildan boshlab pedagoglar uchun davlat xizmatlari bo‘yicha to‘lovlar ikki baravar kamaytiriladi. Milliy sertifikatlarni nafaqat fan o‘qituvchilari, balki boshlang‘ich sinf o‘qituvchilari ham olishi mumkin bo‘ladi. Sertifikat egalari uchun oylik ish haqiga 15 foiz miqdorida ustama belgilanishi nazarda tutilgan.
Bakalavriatni a’lo baholar bilan tamomlab maktabga ishga kirgan bitiruvchilar avtomatik ravishda ikkinchi malaka toifasini, magistratura bitiruvchilari esa birinchi toifani oladi. Dunyoning top-300 reytingiga kiruvchi yetakchi xorijiy universitetlarga qabul qilingan pedagoglar 20 ming dollargacha ta’lim krediti olish imkoniyatiga ega bo‘ladi.
Eng yuqori reytingga ega ta’lim muassasalari xodimlari uchun O‘zbekiston hududi bo‘ylab avia va temiryo‘l qatnovlariga har yili 15–20 foizlik chegirmalar ham joriy etiladi.
Yangi chora-tadbirlar paketi o‘qituvchi maqomini oshirish, ta’lim tizimining kadrlar salohiyatini mustahkamlash hamda pedagoglarning hududlarda uzoq muddatli faoliyatini rag‘batlantirishga qaratilgan.
