O‘zbekiston prezidenti Shavkat Mirziyoyev 11-aprel kuni Buxoro viloyatida barpo etiladigan yangi aeroport loyihasini ko‘zdan kechirdi. Majmua soatiga 1200 nafar yo‘lovchiga xizmat ko‘rsatish quvvatiga ega bo‘ladi va barcha turdagi samolyotlarni qabul qila oladi.
Prezident Shavkat Mirziyoyev Buxoro viloyatiga tashrifi doirasida yangi aeroport va unga tegishli infratuzilma ob’ektlari loyihasi bilan tanishdi. Transport bog‘lamasini qurish uchun shahar tashqarisidan jami 370 gektar yer maydoni ajratilgan. Yangi majmua viloyatning turizm salohiyatini oshirish va yo‘lovchilarga zamonaviy xizmat ko‘rsatishda muhim bo‘g‘inga aylanishi kutilmoqda.
Loyiha doirasida uzunligi 3,3 kilometr bo‘lgan, har qanday rusumdagi samolyotlarni qabul qila oladigan uchish-qo‘nish yo‘lagi hamda soatiga 1200 kishini o‘tkazish quvvatiga ega aerovokzal binosi barpo etiladi. Davlat rahbari majmua jahon standartlariga to‘liq javob berishi va ham mahalliy aholi, ham xorijiy sayyohlar uchun maksimal qulayliklar yaratishi zarurligini ta’kidladi.
Shuningdek, aeroportga olib boruvchi 23,8 kilometrlik avtomobil yo‘li qurilishi ham ko‘zda tutilgan. Mazkur yo‘l yoqasida 2 ta yo‘l o‘tkazgich, 9 ta yer osti piyodalar o‘tish joyi va 8 ta ko‘prik quriladi. Taqdimot davomida prezidentga Buxoro viloyatining iqtisodiy va investitsiyaviy jozibadorligini oshirishga qaratilgan boshqa qurilish ob’ektlari haqida ham ma’lumot berildi.
Izohlar
Hozircha izohlar yo‘q