NASA bugun «Artemida-2» missiyasini boshlamoqda. To‘rt astronavt Oy atrofida o‘n kunlik parvozni amalga oshiradi. Bu Marsga yo‘l ochuvchi tarixiy qadamdir.
AQSH Milliy aeronavtika va kosmik tadqiqotlar boshqarmasi (NASA) «Artemida-2» (Artemis II) pilotli dasturining yakuniy bosqichiga start berdi. Florida shtatidagi Kennedi nomidagi kosmik markazning 39B uchish maydonchasida «Space Launch System» (SLS) o‘ta og‘ir raketasi kema ekipajini ochiq fazoga olib chiqishga shay holatda turibdi. Missiyaning boshlanishi bugun, 1-aprel kuni AQSH Sharqiy qirg‘og‘i vaqti bilan 18:24 ga rejalashtirilgan.
Ekipaj tarkibidan Rid Uayzman, Kristina Kox, Viktor Glover va Jeremi Xansen kabi tajribali fazogirlar o‘rin olgan. Ularning missiyasi shunchaki Oyni aylanib o‘tish emas, balki «Orion» kemasining chuqur koinotdagi hayotni ta’minlash tizimlarini ekstremal sharoitlarda sinovdan o‘tkazishdir. Mart oyida raketaning geliy tizimidagi nosozliklar sababli kechiktirilgan ushbu parvoz, insoniyatning yarim asrlik tanaffusdan keyingi ilk pilotli Oy missiyasi bo‘lib tarixga kiradi.
Ushbu parvoz muvaffaqiyati 2019-yilda e’lon qilingan «Artemida» dasturining poydevori hisoblanadi. Uning pirovard maqsadi — Oyda doimiy bazani tashkil etish va bu tajribadan kelajakda Mars sayyorasiga insonli missiyalarni jo‘natishda foydalanishdir. Bugungi start — insoniyatning uzoq koinot sari tashlagan eng dadil qadami bo‘lishi kutilmoqda.
