Shavkat Mirziyoyev Andijonda 9,4 mlrd dollarlik 206 ta loyihani ishga tushirdi va yangi obyektlar qurilishini boshlab berdi. Hududda 45 mingta yangi ish o‘rni yaratiladi.
Yirik loyihalarning ishga tushirilishi va qurilish bosqichlari O‘zbekiston Respublikasi Prezidenti Shavkat Mirziyoyev Andijon viloyatiga tashrifi doirasida yangi investitsiya loyihalarini ishga tushirish hamda yangi ob’yektlar qurilishiga start berish marosimida ishtirok etdi. Marosimda viloyatning barcha 16 ta shahar va tumanini qamrab olgan, umumiy qiymati 9,4 milliard dollarga teng bo‘lgan 206 ta hududiy va tarmoq loyihalari taqdimoti o‘tkazildi. Davlat rahbari ramziy tugmani bosib, qiymati 2,05 milliard dollar bo‘lgan 98 ta yangi loyihani rasman foydalanishga topshirdi va 7,35 milliard dollarlik 108 ta inshoot qurilishini boshlab berdi. Investitsiya dasturlari energetika, mashinasozlik, to‘qimachilik, qurilish, farmatsevtika, ta’lim, tibbiyot, logistika va turizm kabi strategik sohalarni rivojlantirishga qaratilgan.
Sanoat kooperatsiyasi va infratuzilma obyektlari Ushbu tashabbuslar Xitoy, Turkiya, Janubiy Koreya, AQSh, Rossiya, Belarus, Germaniya, Hindiston, BAA hamda Tojikiston kompaniyalari hamda mahalliy tadbirkorlar sarmoyalari hisobidan ro‘yobga chiqarilmoqda. Loyihalar doirasida elektr avtobuslar, quyosh panellari, mikrogidroenergetika uskunasi, yuk vagonlari va transport vositalari ishlab chiqarish quvvatlari barpo etiladi. Yashil energetika yo‘nalishida gidroelektr stansiyalari hamda chiqindilarni qayta ishlash orqali elektr energiyasi hosil qiluvchi majmualar barpo etiladi. Shuningdek, paxta-to‘qimachilik klasterlari, mebelsozlik va charm-poyabzal sanoat zonalari, zamonaviy turar joy majmualari, xalqaro logistika va turizm markazlari hamda tibbiyot muassasalari faoliyati yo‘lga qo‘yiladi.
Ijtimoiy-iqtisodiy samara va eksport salohiyati Keng ko‘lamli loyihalarning amalga oshirilishi Farg‘ona vodiysi iqtisodiyoti uchun kuchli turtki bo‘ladi. Yangi korxona va majmualarning to‘liq quvvatga chiqishi natijasida viloyatda 45 mingdan ortiq yangi va doimiy ish o‘rni yaratiladi. Ishlab chiqarish quvvatlari hisobidan yillik mahsulot ishlab chiqarish hajmi 60,6 trillion so‘mga yetkaziladi. Tayyor mahsulotlarni qo‘shni va uzoq xorij mamlakatlariga eksport qilish hisobidan esa Andijon viloyatining yillik eksport salohiyati qo‘shimcha 533 million dollar miqdorida shakllantiriladi.
