O‘zbekiston Mudofaa vazirligi harbiylari Janubiy Koreyadagi xalqaro musobaqada 316 ball to‘plab, bir nechta rekordlarni yangilagan holda faxrli 1-o‘rinni egalladi.
Musobaqa ko‘lami va ishtirokchilar
Ushbu bellashuvlarda AQSH, Ozarbayjon, Avstraliya va Polsha kabi 7 ta davlatdan kelgan 12 ta jamoa tarkibida 500 nafarga yaqin harbiy iqtidorini sinovdan o‘tkazdi. Turkiya, Meksika, Filippin va Malayziya kabi yana 8 ta mamlakat vakillari esa kuzatuvchi sifatida qatnashdi. Ishtirokchilar tog‘li, o‘rmonli hamda shahar sharoitlarida va ushbu uch hudud birlashtirilgan majmuaviy bosqichda jangovar harakatlarni olib bordi.
O‘zbek harbiylarining tarixiy rekordlari
Vazifa va topshiriqlarni bajarish davomida O‘zbekiston harbiylari musobaqa tarixida kuzatilmagan rekord natijalarni qayd etdi. Tog‘li hududdagi bosqichda vakillarimiz talafotsiz holda mudofaalanayotgan shartli dushmanni to‘liq yo‘q qilib, 7 ta bayroqni qo‘lga kiritdi. Shahar sharoitida kechgan jangda ham harbiylarimiz dushman ob’ektlarini to‘liq egallab, barcha 7 ta bayroqni oldi. Shuningdek, shahardagi ob’ektlarni ushlab turish topshirig‘ida ham birorta askarni yo‘qotmagan holda 7 ta ob’ekt va barcha bayroqlarni egallab, turnir rekordini yangiladi.
Yakuniy natijalar va g‘oliblar
Musobaqa yakunlariga ko‘ra, O‘zbekiston Mudofaa vazirligi jamoasi 316 ball to‘plab, faxrli birinchi o‘rinni egalladi. Ikkinchi o‘rin 212 ball jamg‘argan Kambodjaga nasib etgan bo‘lsa, uchinchi o‘rinni 192 ball bilan mezbon — Koreya Respublikasi jamoasi egalladi.
