AQSh prezidenti Donald Tramp Truth Social tarmog‘ida «Oy bizniki» deya post qoldirdi. Mutaxassislar xalqaro shartnomaga tayangan holda ushbu da’voning qonuniy asosga ega emasligini ta’kidlamoqda.
AQSh prezidenti Donald Tramp o‘zining Truth Social ijtimoiy tarmog‘idagi sahifasida Oyni Amerika Qo‘shma Shtatlariga tegishli deb da’vo qilingan suratni joylashtirdi. Davlat rahbari tasvir ostiga «Oy bizniki» deya qisqa izoh qoldirgan. Suratda fonda Yer ko‘rinib turgan va ustiga AQSh bayrog‘i tushirilgan Oy aks ettirilgan.
Ushbu bayonot xalqaro ekspertlar hamda ilmiy jamiyat tomonidan keskin e’tirozlarga sabab bo‘ldi. Britaniya Kolumbiyasi universitetining astronomiya bo‘yicha faxriy professori Jeymi Mettyusning ta’kidlashicha, hech bir mamlakatning Oyga nisbatan da’vosi huquqiy va qonuniy asosga ega emas. U hatto amerikalik astronavtlarning Oyga qo‘ngani ham Vashingtonga ushbu tabiiy yo‘ldoshga egalik qilish huquqini bermasligini bildirdi.
Oyni o‘zlashtirish yoki unga egalik qilish xalqaro huquq normalariga zid hisoblanadi. BMT Bosh Assambleyasi tomonidan 1966-yil 19-dekabrda qabul qilingan Koinot to‘g‘risidagi shartnomaga ko‘ra, koinot ob’yektlari va osmon jismlari barcha davlatlar uchun tenglik hamda ochiqlik prinsiplari asosida umumiy foydalanish hududi sanaladi.
Hozirgi kunda ushbu xalqaro shartnomani dunyoning 118 ta mamlakati qo‘llab-quvvatlagan. Hujjat shartlariga ko‘ra, Oy va boshqa osmon jismlarini milliy o‘zlashtirish, suverenitet e’lon qilish yoki egallab olish taqiqlanadi.
Izohlar
Hozircha izohlar yo‘q