O‘zbekistonda Adliya vazirligi Atom elektr stansiyasida radiatsiyaviy avariya sodir bo‘lganda harakatlanish tartibini ro‘yxatdan o‘tkazdi. Hujjatda xavf mezonlari va xabar berish tartibi belgilandi.
O‘zbekistonda Atom elektr stansiyasida (AEX) radiatsiyaviy avariya sodir bo‘lgan taqdirda harakatlanish reglamenti rasman tasdiqlandi. Vazirlar Mahkamasi huzuridagi Sanoat, radiatsiya va yadro xavfsizligi qo‘mitasining tegishli qarori Adliya vazirligida davlat ro‘yxatidan o‘tkazildi. Hujjat ob’ektni loyihalashdan tortib uni ishlatishgacha bo‘lgan barcha bosqichlarni qamrab oladi.
Yangi yo‘riqnomada radiatsiya darajasi va favqulodda vaziyat xususiyatidan kelib chiqqan holda ikkita asosiy harakatlanish rejimi belgilandi:
-
“Avariya tayyorgarligi”: Xavfsiz foydalanish me’yorlari buzilganda yoki tabiiy/texnogen OTH (zilzila, yong‘in) yuz berganda joriy etiladi. Nurlanish dozasi ko‘rsatkichlari xodimlar xonasida 10 mkZv/soat, stansiya maydoni va sanitariya-himoya zonasida 2,5 mkZv/soat, kuzatuv zonasida esa fondan 0,1 mkZv/soat oshganda e’lon qilinadi.
-
“Avariya holati”: Og‘irroq hodisalar yuz berganda kiritiladi. Bunda mezonlar: xodimlar xonasida 600 mkZv/soat, stansiya maydonida 200 mkZv/soat hamda kuzatuv zonasida 20 mkZv/soatni tashkil etadi.
Rejimlarni joriy etish qarorini ekspluatatsiya qiluvchi tashkilot rahbari yoki AEX smena boshlig‘i qabul qiladi.
Axborot berish va shtablar faoliyati
Tashvish belligi berilgach, smena boshlig‘i zudlik bilan FVV va tegishli idoralarni xabardor qilishi shart. Keyinchalik radiatsiyaviy vaziyat haqidagi ma’lumotlar rejim bekor qilingunga qadar har 12 soatda yangilab boriladi.
Avariyani boshqarish uchun AEX hududidagi himoyalangan bunkerda ichki shtab, xavfsiz hududda esa tashqi avariya shtabi va ilmiy-texnik qo‘llab-quvvatlash guruhlari tuziladi. Hujjatga ko‘ra, avariyalarni bartaraf etish bazasi to‘liq tayyor bo‘lmaguncha ob’ektga yadro yoqilg‘isini olib kirish taqiqlanadi. Shuningdek, xodimlar bilan mashg‘ulotlar yiliga kamida bir marta o‘tkazilishi shart
