O‘zbekistonda OTMlarga kirish imtihonlari natijalaridan norozi abituriyentlar 15-24-avgust kunlari my.uzbmb.uz orqali apellyatsiya shikoyati topshirishi mumkin. Arizalarni ko‘rib chiqish 19-avgustdan boshlanadi.
O‘zbekistonda 2026/2027-o‘quv yili uchun bakalavriat ta’lim yo‘nalishlariga kirish test sinovlari natijalaridan norozi bo‘lgan abituriyentlar apellyatsiya shikoyati berishlari mumkin. Bilim va malakalarni baholash agentligi xabariga ko‘ra, arizalar 15-avgustdan 24-avgustga qadar (shu kuni ham) onlayn shaklda my.uzbmb.uz saytidagi shaxsiy kabinet orqali qabul qilinadi.
Apellyatsiya shikoyatini faqat test sinovlarida qatnashgan va tartibni buzgani uchun imtihondan chetlashtirilmagan abituriyentlargina topshirish huquqiga ega.
Apellyatsiya arizasini yuborgan abituriyentga uni ko‘rib chiqish sanasi va vaqti ko‘rsatilgan maxsus xabarnoma yuboriladi. Abituriyent belgilangan vaqtda shaxsini tasdiqlovchi hujjat hamda ushbu xabarnoma bilan Bilim va malakalarni baholash agentligiga (yoki xabarnomada ko‘rsatilgan boshqa manzilga) yetib kelishi shart.
Arizalarni bevosita ko‘rib chiqish jarayonlari 2026-yilning 19-avgustidan e’tiboran boshlanadi.
Eslatib o‘tamiz, 2026/2027-o‘quv yili uchun OTMlarga kirish imtihonlarining yakuniy natijalari (mandat) 15-avgust kuni rasman e’lon qilingan edi.
Izohlar
Hozircha izohlar yo‘q