Sharifa Davronova Polshadagi jahon forumida kuchli o‘nlikdan joy oldi. Polshaning Kuyaviya-Pomorse o‘lkasi mezbonlik qilayotgan yengil atletika bo‘yicha yopiq inshootlardagi jahon chempionati o‘zbekistonlik ishqibozlar uchun quvonchli xabar olib keldi.
Uch hatlab sakrash bahslarida 19 yoshli hamyurtimiz Sharifa Davronova dunyoning eng sara 17 nafar sportchisi orasida munosib ishtirok etib, yakuniy o‘ntalikka kirdi.
Samarqand yengil atletika maktabi vakilasi bo‘lgan Sharifa o‘z mahoratini sezilarli darajada oshirganini ko‘rsatdi:
-
hamyurtimiz 13,81 metrga sakrab, dunyo reytingida 10-pog‘onani band etdi.
-
yosh sportchi o‘tgan yilgi jahon birinchiligidagi natijasiga qaraganda birdiga 37 santimetrgako‘proq masofani bosib o‘tishga erishdi.
Mazkur yo‘nalishda oltin medalni kubalik Leaniz Peres Ernandes (14,95 metr) qo‘lga kiritgan bo‘lsa-da, Davronovaning kuchli o‘nlikka kirishi uning xalqaro maydondagi nufuzi oshib borayotganidan dalolat beradi.
Ayni damda 118 davlat vakillari ishtirok etayotgan musobaqaning umumjamoa hisobida quyidagi mamlakatlar peshqadamlik qilmoqda:
-
Italiya — 3 ta oltin bilan birinchi o‘rinda.
-
AQSh — 2 ta oltin, 5 ta kumush va 3 ta bronza bilan ikkinchi o‘rinda.
-
Ukraina — 2 ta oltin va 1 ta kumush bilan kuchli uchlikni yakunlab bermoqda.
Polsha arenalarida jami 27 ta medallar to‘plami o‘z egalariga topshiriladi. O‘zbekiston terma jamoasi vakillari nufuzli musobaqa doirasida o‘z chiqishlarini davom ettirmoqdalar.
