Vashington bozor barqarorligi uchun Eron nefti eksportiga vaqtinchalik ruxsat berdi. Energiya resurslari narxining keskin ko‘tarilishi fonida AQSh ma’muriyati kutilmagan qadam tashlab, Tehronga nisbatan sanksiya bosimini qisman yumshatdi.
BBC ma’lumotlariga ko‘ra, Amerika hukumati dunyo neft bozoridagi «qizish»ni pasaytirish maqsadida Eronning «qora oltini» bilan bog‘liq operatsiyalarni amalga oshirishga bir oy muddatga ruxsat bergan.
AQSh Moliya vaziri Skott Bessent ushbu qarorni «tor doiradagi» va vaqtinchalik chora deb atadi. Uning hisob-kitoblariga ko‘ra, o‘ttiz kunlik «oyna» jahon savdo maydonchalariga taxminan 140 million barrel neft yo‘naltirish imkonini beradi.
Mazkur aralashuvdan asosiy maqsad — strategik jihatdan muhim hisoblangan Hormuz bo‘g‘ozida kemalar qatnovidagi jiddiy uzilishlar tufayli yuzaga kelgan taklif tanqisligini bartaraf etishdir. Hozirgi vaqtda Eron resurslarining asosiy xaridori Xitoy bo‘lib qolmoqda, rasmiy Pekin ushbu xomashyoni sezilarli chegirma bilan sotib olmoqda.
Ta’kidlash joizki, Eron Vashington tomonidan «sanksiyaviy tanaffus» taktikasi qo‘llanilgan yagona davlat emas. Avvalroq Rossiya nefti yetkazib berish bo‘yicha ham shunday qisqa muddatli istisnolar joriy etilgan edi. Ekspertlarning fikricha, Oq uy shu orqali siyosiy bosim o‘tkazish va mamlakat ichidagi benzin hamda yoqilg‘i narxlarini maqbul darajada ushlab turish zarurati o‘rtasida muvozanatni saqlashga urinmoqda.
Izohlar
Hozircha izohlar yo‘q