Migratsiya agentligi hamda AQShning yirik rekruting kompaniyasi o‘rtasida hamkorlik kelishuvi imzolandi. Fuqarolar H-2A vizasi doirasida qishloq xo‘jaligidagi mavsumiy ishlarga yuboriladi.
Migratsiya agentligi va AQShning xorijiy ishchilarni qishloq xo‘jaligi sohasiga jalb qilishga ixtisoslashgan yirik rekruting kompaniyasi o‘rtasida hamkorlik kelishuvi imzolandi.
Tomonlar H-2A vizasi dasturi doirasida O‘zbekiston fuqarolarini AQShga mavsumiy ishlarga tayyorlash hamda ishga joylashtirish bo‘yicha kelishuvga erishdi.
Loyiha doirasida quyidagi choralar amalga oshiriladi:
-
Amerika ish beruvchilarining talablariga mos ta’lim dasturlarini ishlab chiqish;
-
Ingliz tili va kasbiy tayyorgarlik kurslarini tashkil etish;
-
Nomzodlarning amaliy ko‘nikmalarini baholash hamda birgalikda sertifikatlash;
-
Ishchilarni saralash va yuborishning shaffof mexanizmlarini joriy etish.
Migratsiya agentligi nomzodlarni saralash, ularni AQSh mehnat qonunchiligi va mehnat sharoitlari bo‘yicha tayyorlash hamda shartnoma yakunlangach fuqarolarning vatanga o‘z vaqtida qaytishini nazorat qilish uchun mas’ul bo‘ladi.
Nomzodlarga qo‘yiladigan talablar va ro‘yxatdan o‘tish tartibi haqidagi ma’lumotlar «Xorijda ish» Telegram-kanalida e’lon qilib boriladi.
