O‘zbekiston Xitoyning Star Vision kompaniyasi bilan birgalikda yer resurslarini masofadan zonduvchi sun’iy yo‘ldoshni orbitaga chiqardi. Qurilmaga Uzcosmos sun’iy intellekt moduli o‘rnatilgan.
Bugun, 5-avgust kuni O‘zbekiston va Xitoyning Star Vision kompaniyasi hamkorligidagi Samarkand-2028 giperspektral sun’iy yo‘ldoshi muvaffaqiyatli ravishda orbitaga olib chiqildi. Kosmik apparat Xitoyning Shandun provinsiyasi qirg‘oqlaridagi dengiz start platformasidan uchirildi.
Ushbu sun’iy yo‘ldoshning boshqa apparatlardan asosiy afzalligi shundaki, unga Uzcosmos mutaxassislari tomonidan ishlab chiqilgan sun’iy intellekt moduli o‘rnatilgan. Ushbu texnologiya olingan ma’lumotlarni bevosita koinotning o‘zida qayta ishlash imkonini beradi va tezkorlikni keskin oshiradi. Toplangan ma’lumotlar qishloq xo‘jaligi, suv resurslarini nazorat qilish, ekologik monitoring hamda boshqa sohalarda qo‘llaniladi.
Sun’iy yo‘ldoshga Samarkand-2028 nomi 2028-yilda Samarqand shahrida o‘tkaziladigan Xalqaro astronavtika kongressi (IAC) sharafiga berilgan. Hozirda O‘zbekiston 2028-yilda uchirilishi rejalashtirilgan “Mirzo Ulug‘bek” nomli birinchi ilmiy sun’iy yo‘ldosh ustida ish olib bormoqda, shuningdek, mamlakatimizning ilk kosmonavtini koinotga yuborish loyihasi ham ko‘rib chiqilmoqda.
