O‘zbekistonda hayvonlarga nisbatan shafqatsiz munosabatda bo‘lganlik uchun jarimalar oshirildi, takroriy huquqbuzarlik uchun esa 15 sutkagacha ma’muriy qamoq yoki jinoiy javobgarlik belgilandi.
O‘zbekistonda hayvonlarga nisbatan shafqatsiz munosabatda bo‘lganlik uchun javobgarlik choralari va jarima miqdorlari sezilarli darajada kuchaytirildi. Prezident Administratsiyasi rahbari Saida Mirziyoyeva 28-iyundan e’tiboran kuchga kirgan qonunchilikdagi ushbu muhim o‘zgarishlar haqida eslatib o‘tdi.
Yangi tartibga ko‘ra, Ma’muriy javobgarlik to‘g‘risidagi kodeksning 111-moddasi bo‘yicha belgilanadigan jazo choralari quyidagicha oshirildi:
-
Birinchi marta sodir etilganda: Ilgari BHMning 3 baravaridan 5 baravarigacha bo‘lgan bo‘lsa, endilikda BHMning 7 baravaridan (2,88 mln so‘m) 10 baravarigacha (4,12 mln so‘m) miqdorida jarima solinadi;
-
Takroriy sodir etilganda: BHMning 15 baravaridan (6,18 mln so‘m) 25 baravarigacha (10,3 mln so‘m) jarima yoki 15 sutkagacha ma’muriy qamoq jazosi qo‘llaniladi;
-
Huquqbuzarlik davom ettirilgan taqdirda: Fuqarolarga nisbatan oylik va erkinlikdan mahrum qilishgacha bo‘lgan jinoiy javobgarlik nazarda tutilgan.
Saida Mirziyoyeva bunday qonunlar nafaqat aybdorlarni jazolashi, balki jamiyat uchun qaysi qadriyat va qoidalar majburiy ekanligini ko‘rsatib berishini ta’kidladi.
«Jamiyatimiz xavfsizligi zo‘ravonlikka nisbatan toqatsizlikka doir qarashlarga bevosita bog‘liq. Hayvonlarga nisbatan shafqatsizlik uchun jazoni kuchaytirish har qanday hayotga hurmat bilan qarash mutlaq normaga aylanadigan muhitni shakllantirishga yordam beradi. Diling tusaydigan va farzandlaringni tarbiyalashni xohlaydigan dunyo aynan shunday bo‘lishi kerak.
O‘zga hayotga hurmat bolalikdan boshlanadi va bu o‘rinda asosiy rol ota-onalarga tegishli. Aynan ular bolaga ojizni xafa qilish mumkin emasligini, kuchni esa shafqatsizlik bilan isbotlab bo‘lmasligini o‘rgatadilar. Men ota-onalarni buni hech qachon unutmaslikka chaqiraman», — deb yozdi Saida Mirziyoyeva.
Prezident Administratsiyasi rahbari o‘z xabariga Administratsiya binosida yashaydigan Yalpiz va Darxon ismli ikkita mushuk tasvirlangan qisqa videoni ham ilova qildi.
