Toshkentning Yunusobod tumanidagi avtobus bekatida 1994-yilda tug‘ilgan kuryer o‘zini osib, joniga qasd qildi. Bosh prokuratura xabariga ko‘ra, marhumning bankdan qarzi bo‘lgani aniqlangan.
Hodisa 25-iyul kuni soat 15:00 atrofida yuz bergan. Toshkentda tug‘ilgan, xususiy kompaniyada kuryer bo‘lib ishlagan va oilali M.M. bekat hududida osilgan holda topilgan. Sud-tibbiy ekspertizasining dastlabki xulosasiga ko‘ra, o‘limga bo‘yin sohasidagi strangulyatsion egatlar natijasida kelib chiqqan mexanik asfiksiya sabab bo‘lgan, tanada boshqa jarohatlar aniqlanmagan.
Huquq-tartibot organlari marhumning yaqin qarindoshlarini so‘roq qildi. Dastlabki ma’lumotlarga ko‘ra, fuqaroning bank oldida qarzdorligi bo‘lgani aniqlangan. Hozirda mazkur holat yuzasidan Yunusobod tumani prokuraturasi tomonidan tergovga qadar tekshiruv harakatlari olib borilmoqda.
Eslatib o‘tamiz, avvalroq Qashqadaryo viloyati Chiroqchi tumanida 47 yoshli qaynona keliniga ruhiy va jismoniy bosim o‘tkazishi oqibatida kelin o‘z joniga qasd qilgani haqida xabar berilgan edi.
Izohlar
Hozircha izohlar yo‘q