Ayrim rossiyalik xotin-qizlar harbiy komissariatlardan chaqiruv qog‘ozi olishni boshladi. Rasmiylarga ko‘ra, jarayon ma’lumotlarni aniqlashtirish va shartnoma bo‘yicha xizmat taklif qilish bilan bog‘liq.
Rasmiy idoralarning ma’lum qilishicha, ushbu jarayon asosan harbiy hisobda turgan fuqarolarning shaxsiy ma’lumotlarini yangilash va bazani aniqlashtirish maqsadida amalga oshirilmoqda. Shuningdek, chaqirilgan xotin-qizlarga ixtiyoriy ravishda shartnoma asosida harbiy xizmatga jalb etilish imkoniyatlari ham taklif qilinmoqda.
Hukumat vakillari ushbu vaziyat yuzasidan izoh berib, mamlakatda xotin-qizlarni majburiy ravishda harbiy xizmatga yoki safarbarlikka jalb etish bo‘yicha hech qanday rasmiy qaror qabul qilinmaganini alohida ta’kidlashgan.
Mazkur tadbirlar rejaviy xarakterga ega bo‘lib, asosan tibbiyot xodimlari, aloqa va axborot texnologiyalari kabi harbiy-hisob mutaxassisligiga ega bo‘lgan ayollarni qamrab olmoqda.
