Farg‘ona viloyatida leytanant Ozodbek Quldoshaliev bilan vidolashuv marosimi bo‘lib o‘tdi. Maxsus motoguruh komandiri 16-iyul kuni Toshkentda xizmat mototsikli va Onix to‘qnashuvi oqibatida halok bo‘lgan edi.
17-iyul kuni Farg‘ona viloyatining Qo‘qon shahrida Yo‘l-patrul xizmati brigadasi maxsus batalyoni motoguruhi komandiri, leytenant Ozodbek Madiyorjon o‘g‘li Quldoshaliev bilan vidolashuv marosimi bo‘lib o‘tdi. Toshkent shahrida yuz bergan ayonchli yo‘l-transport hodisasi oqibatida 29 yoshli xodim fojiali halok bo‘ldi. Yo‘l harakati xavfsizligi boshqarmasi rahbariyati, YXHB brigadasi qo‘mondonligi va barcha shaxsiy tarkib marhumning oilasi, yaqinlari hamda qarindoshlariga chuqur hamdardlik bildirdi.
Eslatib o‘tamiz, mudhish avariya joriy yilning 16-iyul kuni Toshkentning Mirzo Ulug‘bek tumanida sodir bo‘lgan edi. Do‘rmon yo‘li ko‘chasida YXHBning xizmat mototsikllari va «Chevrolet Onix» rusumli avtomobil ishtirokida to‘qnashuv yuz bergan. Olingan og‘ir jarohatlar oqibatida leytenant O. Quldoshaliev voqea joyida vafot etgan. Hozirda huquq-tartibot idoralari tomonidan mazkur inson o‘limiga sabab bo‘lgan hodisaning barcha tafsilotlarini o‘rganish ishlari davom ettirilmoqda.
