Rossiya Ichki ishlar vazirligi mamlakatga kelayotgan migrantlar uchun mobil telefon sotib olishni majburiy qilmoqchi. Qurilmadagi elektron profil orqali xorijliklar doimiy nazorat qilinadi.
Rossiya Ichki ishlar vazirligi mamlakatga kelayotgan xorijlik migrantlar uchun yangi majburiyat joriy etishni rejalashtirmoqda. Rossiya ichki ishlar vaziri o‘rinbosari Igor Zubovning ma’lum qilishicha, endilikda har bir migrant ro‘yxatdan o‘tishda mobil telefon sotib olishga majbur bo‘ladi. Ushbu qurilmada chet el fuqarosining maxsus elektron profili yaratiladi.
Bu tizim huquq-tartibot idoralariga migrantning aniq qayerda ekanini bilish, uning bir hududdan boshqasiga nazoratsiz ko‘chib o‘tishini cheklash hamda hujjatlar muddati tugashi haqida o‘z vaqtida xabardor qilib borish imkonini beradi.
Mazkur loyihaning asosi sifatida 2025-yil 1-sentabrdan boshlab Moskva mintaqasida «Amina» mobil ilovasi sinovdan o‘tkazila boshlandi. Vizasiz tartibda keluvchi voyaga yetgan barcha migrantlar ushbu ilova orqali o‘z geolokatsiyasini uzatib turishi shart. Geolokatsiya nazorati tizimi hozirdanoq qat’iy choralar ko‘rishni boshlagan.
Rossiya IIV ma’lumotlariga ko‘ra, dekabr oyi o‘rtalariga kelib «Amina» tizimiga uch ish kuni davomida geolokatsiya ma’lumotlarini yubormagani sababli 139 mingdan ortiq xorijlik migrant migratsiya hisobidan chiqarib yuborilgan.
Izohlar
Hozircha izohlar yo‘q