Energetika vazirligi tizimdagi rekord yuklama tufayli hududlarda elektr ta’minoti vaqtincha ikki soatgacha o‘chirilishini ma’lum qildi. Bu chora yirik avariyalarning oldini olishga qaratilgan.
O‘zbekistonning bir qator hududlarida elektr energiyasi ta’minoti vaqtincha ikki soatgacha o‘chiriladi. Energetika vazirligi xabariga ko‘ra, ushbu majburiy chora dispetcherlik xizmatlariga elektr tarmoqlarining alohida uchastkalaridagi yuklamani kamaytirish uchun zarur. Cheklovlar g‘ayritabiiy issiq sharoitida o‘ta yuqori yuklama bilan ishlayotgan jihozlarni asrab qolish va yirik texnologik avariyalarning oldini olish maqsadida joriy etilmoqda.
Ikki soatlik o‘chirishlarga anomal issiq fonida elektr iste’molining keskin ortishi sabab bo‘ldi — joriy haftada yozgi iste’mol rekordi uchinchi marta yangilandi. 16-iyul kuni mamlakat yagona energetika tizimida sutkalik ko‘rsatkich mutlaq tarixiy cho‘qqiga — 291 million kVt/soatga yetdi (o‘tgan yilgi maksimal ko‘rsatkichdan 6,7 foizga ko‘p). Vaziyatni ochiq havodagi elektr uzatish liniyalari va transformatorlarning quyosh ostida qizib ketishi yanada qiyinlashtirmoqda, bu esa ularning shikastlanish xavfini oshiradi.
Hozirgi vaqtda ikki soatgacha bo‘lgan vaqtinchalik cheklovlar respublikaning to‘rtta viloyatidagi minglab iste’molchilarni qamrab olgan. Xususan, Qashqadaryo viloyatining Ko‘kdala va Chiroqchi tumanlarida 1750 ta, Xorazm viloyatining Shovot, Gurlan va Qo‘shko‘prik tumanlarida 1300 ta xonadon chiroqsiz qolgan. Shuningdek, Jizzax viloyatining Sharof Rashidov va Zomin tumanlarida 1200 ta, Toshkent viloyatining Toshkent va Zangiota tumanlarida esa 1000 ta iste’molchi vaqtincha elektr ta’minotidan uzilgan. Vazirlik ushbu choralarning profilaktik ahamiyatga ega ekanini eslatib, aholini kunning eng issiq vaqtida energiyani tejashga chaqirdi.
Izohlar
Hozircha izohlar yo‘q