Bilimni baholash agentligi davlat oliy va kasbiy ta’lim muassasalariga kirish imtihonlari muddatini e’lon qildi. Test sinovlari joriy yilning 14-iyulidan 23-iyuliga qadar kuniga ikki smenada bo‘lib o‘tadi.
O‘zbekistonda 2026/2027-o‘quv yili uchun davlat oliy va kasbiy ta’lim muassasalariga qabul test sinovlari o‘tkaziladigan kunlar ma’lum qilindi. Bu haqda Bilimni baholash agentligi xabar berdi.
Imtihonlar joriy yilning 14-iyulidan 23-iyuliga qadar 10 kun davomida tashkil etiladi. Test sinovlari kuniga ikki smenada o‘tkazilib, 1-smena soat 08:00 da, 2-smena esa 15:00 da boshlanadi. Abituriyentlardan test sinovlari boshlanishidan kamida bir yarim soat oldin belgilangan hududga yetib kelish talab etiladi.
Imtihon qoidalari va kerakli hujjatlar: Testda ishtirok etish uchun ruxsatnomalar my.uzbmb.uz platformasi orqali berilmoqda. Abituriyentlar imtihonga pasport (ID-karta) va abituriyent ruxsatnomasining asl nusxasi (chop etilgan shakli) bilan kelishlari shart. Fuqarolar faqat ruxsatnomada ko‘rsatilgan manzil, sana va smenadagina imtihonga kiritiladi. Pasport nusxasi bilan kelgan yoki kechikkanlar testga qo‘yilmaydi.
