Kongo Demokratik Respublikasidagi gumanitar missiyadan qaytgan shifokorda Ebola aniqlandi. Kongodagi epidemiya o‘lim ko‘rsatkichi bo‘yicha rekord o‘rnatmoqda.
Euronews xabariga ko‘ra, Fransiya Sog‘liqni saqlash vazirligi virus tarqalishining oldini olish uchun barcha zaruriy choralar ko‘rilganini ma’lum qildi. Bemor mamlakat hududiga qadam qo‘yishi bilanoq darhol izolyatsiyaga olingan va maxsus sharoitlarda shifoxonaga yetkazilgan. Hozirda mutaxassislar bemor bilan aloqada bo‘lgan barcha shaxslarni aniqlash ustida ishlamoqda, ular uch haftalik uy karantiniga olinishi mumkin.
Kongo Demokratik Respublikasining o‘zida esa vaziyat ancha jiddiy — may oyi o‘rtalaridan buyon 1000 dan ortiq kishi kasallikka chalindi, 254 nafar bemor esa vafot etdi. Bu epidemiyaning birinchi oyi uchun rekord darajadagi ko‘rsatkichdir.
Jahon sog‘liqni saqlash tashkiloti inqiroz mintaqaviy tus olishidan xavotirda, chunki qo‘shni Ugandada va 20-iyun kuni Isroilda ham ushbu virusga chalinish bo‘yicha shubhali holatlar ro‘yxatga olindi. Shunga qaramay, Kasalliklarning oldini olish va nazorat qilish bo‘yicha Yevropa markazi (ECDC) Yevropa aholisi uchun infeksiya xavfini o‘ta past deb baholamoqda.
